ANG BABAYE’NG boksidor nga si Nesthy Petecio mibalik na sa pagbansay-bansay
miaging semana didto sa Baguio City human sa iyang duha ka semana nga kwarentina
sukad sa iyang pagbalik sa nasud.
“Human na ang quarantine period nako. Nibalik nako sa training og hinay-hinay,” matud pa sa 27-anyos nga si Petecio.
Si Petecio nga taga Sta. Cruz, Davao del Sur, gikan pa sa 2020 Asia/Oceania boxing
qualifying tournament sa Amman, Jordan sa miaging bulan.
Ang world 57kg champion, hinuon, napakyas sa iyang tinguha nga makadula sa Olympics human siya gipildi ni Sena Irie sa Japan, 4-6, sa ilang sangka didto sa Jordan.
Gipa-ulanan ni Petecio og mga left cross ang Haponesa nga boksidor, apan nigawas
gihapong mananaog ang 19-anyos nga si Irie sa ilang away sa ring.
Hinuon, wala gihapon mawad-i og paglaum si Petecio nga makadula gihapon sa Olympics human sa taho nga ang ubang qualifier sa ubang nasud nagpositibo sa coronavirus.
“Naay mga nag-positibo sa qualifiers, busa kinahanglan pangandaman. Basin duna pa’y
madugang nga slots tungod ani,” ingon ni Petecio.
Dugang ni Petecio nga naghulat lang siya og aviso gikan sa Association of Boxing
Alliances in the Philippines (ABAP) kung mahimo pa ba siyang maka-apil sa final
qualifying tournament para sa Tokyo Olympics nga gi-postpone sa July sunod
tuig tungod sa Covid-19 pandemic.
Ang status sa mga qualifier nga natakdan sa virus kasamtangang gituki sa mga
dagkong opisyal sa ABAP ug sa International Olympic Committee Boxing
Task Force.
“Naghulat lang mi sa desisyon, ug kung asa ug kanus-a ang sunod nga qualifying
tournament,” sulti ni Petecio, nga mibalik na og jogging ug ensayo sulod sa Teachers
Camp didto sa Bauio.
Unom ka miyembro sa duha ka boxing team nga nisalmot sa Olympic qualifying
tournament sa London niadtong Marso ang gikatahong natakdan sa coronavirus.
Duha ka boksidor ug coach sa Turkey, ug usa ka boksingero ug duha ka coach sa
Croatia nag-positibo sa Covid-19 human sa maong torneyo.
Si Petecio, mga maoy nakadaug sa bulawang medalya sa miaging 30th Southeast Asian Games, wala na makapa-uli sa Davao gikan sa iyang dula sa Jordan tungod sa lockdown sa Luzon ug sa Davao City.
