ANG WORLD women’s featherweight champion nga si Nesthy Petecio nagpabiling naka-kwarentina sa Baguio City, apan wala siya’y gibating kahasol sa iyang kahimtang.
Ingon ni Petecio nga gusto na kaayo silang mobalik sa ilang training apan ang track oval sa Teachers’ Camp nagpabiling sirado samtang ang national boxing gym padayon pang gi-ayo.
Dugang ni Petecio nga wala usab siya’y reklamo sa mga restriksyon nga striktong gipatuman sa Baguio bisan ang dakbayan gipaubos na sa general community quarantine (GCQ).
Ang Baguio City, kinsa gipaubos na sa GCQ gikan sa enhanced community quarantine (ECQ) sukad niadtong Mayo 16, maoy usa sa mga lokal nga kagamhanan (LGU) nga malampusong nakapugong sa pagkatap sa coronavirus sa ilang dakbayan.
Gidayeg ni Petecio ang striktong pag-implementar sa Baguio City Government sa “stay home policy,” ilabi na ang ilang paghimo og schedule sa mga barangay nga makapangumpra sa merkado.
“Para nako, mas maayo nang buhaton. Mapugngan nato ang gidaghanon sa mga tawo sa gawas,” saysay sa babayeng kampeon sa boksing.
Gawas sa paghulat sa panahon kung kanus-a siya makabalik sa iyang regular nga pagbansay-bansay, si Petecio nagpaabot usab sa adlaw nga siya makapauli na ug makita ang iyang pamilya sa Davao.
“Mingaw na. Gimingaw na gyud ko sa akong pamilya. Gusto nakong makakita nila,” pulong pa ni Petecio. (LBG)
