DAKBAYAN SA DABAW — PORMAL nang gituboy ni Presidente Rodrigo Duterte si Dante Gierran isip bag-ong Presidente ug Chief Operating Officer sa Philippine Health Insurance Corporation (PhilHealth) samtang si Lieutenant General Camilo Cascolan isip bag-ong hepe sa Philippine National Police Chief, niadtong milabayng semana.
Si Gierran, usa ka abogado ug Certified Public accountant mihulip ni Ricardo Morales, nga mikanaug sa iyang puesto human naburuka ang gikatahong P15bilyon nga anomalya sa maong ahensya.
Ang pagtuboy kang Gierran sa PhilHealth usa sa mga lakang sa administrasyong Duterte nga limpyohan ang maong ahensya batok sa mga anomalya nga milambigit sa kontribusyon sa katawhan, tungod kay ilang gisalig ang ilang kuarta sa panudlanan sa PhilHealth, sa pagtuo nga ila kining magamit panahon sa emerhensiya sa panglawas.
Si Morales ug uban pang kadagkuan sa PhilHealth nag-atubang sa imbistigasyon sa Senador ug sa Kongreso kabahin sa paggamit sa pondo sa Interim Reimbursement Mechanism (IRM) kung diin, ibalik sa PhilHealth ang mga personal nga gasto sa mga membro sa panahon nga sila magsakit ug bayaran sa maong buhatan ang ilang gasto sa pagpatambal.
Apan, nadiskobrehan nga adunay sindikato sa maong ahensya nga milambigit sa daghang opisyal, doktor ug mga hospital nga nagkuha ug bayad sa maong ahensya bisan paman ordinaryo ang mga sakit sa pasyente samtang kadaghanan kanila, wala mahibalo nga giapil sila sa listahan sa sindikato.
Nidtong Lunes sa gabii, gimanduan ni Duterte si Gierran nga limpyohan ang ahensya sa mga personahe ug opisyal nga dunay kalambigitan sa sindikato.
Samtang si Cascolan, gitudlo nga hulip ni PNP CHief Archie Francisco Gamboa nga miretiro na basi sa mandato sa PNP nga ang 56-anyos nga personahe moretiro na sa serbisyo.-Newsline.ph
