DAKBAYAN SA DAVAO-— patay gilayon si Police Captain Arnold Moralde human kini gipusil sa usa ka lalaki nga nagdalag armas sa palengke sa Parang, Maguindanao del Norte, kaganinang buntag, Huebes, Mayo 2.
Si Moralde ang commander sa 14th Mobile Force Battalion sa Bangsamoro Region Police.
Sumala ni Parang PNP Chief Police Major Christopher Cabugwang, nga didto sa palengke si Moralde sa dihang nisulay kini pagdakop sa usa ka lalaki nga nagdala og armas. Apan, imbes mosurender gipusil niini sa makadaghang higayon si Moralde.
Apan, sa usa ka CCTV footage nga nagkalat karon, makita nga nagginukdanay pa si Captain Moralde sa suspek nga dunay duha pa ka kauban, ug nagtuyoktuyok pa sa usa ka puti nga van nga nagparking una natumba ang opisyal.
Daling naglusad ang kapulisan og operasyon sa pagpangita sa mipatay kang Moralde ug nakigtambayayong sila sa mga opisyal sa barangay sa pagpangita sa suspek nga giila sa mga saksi nga si Mohiden Ramalan Untal, kinsa samdan sa pagbinayloay og bala kang Moralde.
Nahitabo ang pagpamusil kang Moralde pipila lang ka kilometro gikan sa regional headquarters sa Bangsamoro police, kung diin mibisita si Pangulong Ferdinand Marcos Jr. niadtong Martes aron manguna sa sa graduation sa mga police trainee nga kanhi mga gerilya sa Moro niadtong Abril 29.
