DAKBAYAN SA DABAW— Gibutyag ni Spokesperson Harry Roque nga dili motungha si Presidente Rodrigo Duterte sa panagpulong sa Association of Southeast Asian Nations leaders sa Jakarta, Indonesia karong umaabot nga Abril 24 tungod sa hulga sa pandemya.
“Ang isyu lang, pwede ba kini face-to-face o virtual? Daghang mga lider sa nasod sab ang dili makatambong sa ASEAN ug magpadala lang ug mga representatibo,” sumala niya sa usa ka media briefing sa Malacañang.
Foreign Affairs Secretary Teodoro Locsin Jr. ang naatasang motungha sa panagpulong sa mga lider. Sa usa ka pahayag sa DFA, gipadangat nga dili mutambong sa miting ang Presidente para sagubangon ang mga domestic concerns bahin sa pagtaas sa mga kaso sa COVID-19.-Desiree Flores
