DAKBAYAN SA TAGUM –— PAGTINGOG sa sirena, niadtong Sabado, Pebrero 28, pormal nang gisugdan ug gipangunahan sa governador sa Davao del Norte ang usa ka hiniusang pagpanglimpyo sa probinsya.
Sa usa ka Memorandum Order nga gipirmahan ni Gobernador Edwin I. Jubahib, gimandu niini ang dungan nga pagpanglimpyo sa tanang lugar sa probinsya matag kataposang Byernes sa bulan sugod alas 3:00 hangtud alas 5:00 sa hapon.
Gitawag kini ni Jubahib nga ‘Oplan Barangay Linis.’ Napili ang Barangay Alejal sa Carmen alang sa unang pag-arangkada sa programa.
Kahinumduman nga sa unang bulan sa paglingkod ni Jubahib, mideklara ang LGU Samal ug State of Calamity tungod sa dengue, og aron malikayan ang susamang hitabo gilusab ang Oplan Linis og gitan-aw kining pinaka-epektibong paagi sa pagsumpo sa sakit nga dala sa lamok.
“Mao ni ang atong hini-usang tubag- Oplan Linis. Buot pasabot atong tanggalon ug limpyohan ang tanang posibleng balayan sa lamok nga nagdala sa dengue,” pasabot ni Jubahib.
Nanawagan ang gobernador sa tibuok probinsya sa Davao del Norte, nga moduyog sa among aktibidad.
Gi-awhag usab niya ang mga barangay opisyal nga manguna sa maong kalihukan aron maaghat ang katawhan nga mosunod sa ilang hinimuan nga maayo alang sa tanan.
Kung limpyo na ang mga palibot, gisugyot sa governador nga mananom ug gulay diha sa ilang mga tugkaran ingon sa naunod sa iyang laing Executive Order “Gulayan sa Tugkaran” aron masumpo dili lang dengue lakip na ang kawad-on ug malnutrisyon ug malikayan ang kaulaw nga magsige’g pangayo ug gulayon sa silingan.
Nagpasalamat si Jubahib sa taga munisipyo sa Carmen ug sa mga opisyal sa barangay Alejal kung diin didto unang gihimo ang Oplan Linis.
Si Carmen Mayor Virginie Perandos nag-awhag usab sa iyang katawhan nga himoun ang pagpanglipyon kada adlaw dili lang kada biernes tungod kay dakku kini ug matabang sa pagsumposa Dengue ug aron limyo usab ang ilang palibot.-LG/DavaoNor
