DAVAO CITY — Ang Philippine Sports Commission (PSC) mihimo og health and safety committee atol sa ilang online board meeting kagahapon, Mayo 12.
Ang bag-ong komitiba gibuhat ni PSC chairman William Ramirez pinasubay sa “occupational and health safety standards for public sector” nga hiniusang giluwatan sa Department of Health (DOH), Civil Service Commission (CSC), ug Department of Labor and Employment (Dole).
Ang komitiba opisyal nga pagasugdan karong Mayo 22, matud pa sa PSC sa ilang post sa Facebook.
Si PSC executive director Merly Ibay ang gitudlo nga mangulo sa maong komitiba, samtang ang duha ka deputy executive director nga sila si Dennis Rivera ug Atty. Guillermo Iroy, ug chief of staff Marc Velasco maoy magsilbi nga mga deputy.
Lakip sa nahisgutan sa board meeting ang pagkuha og mga personal protective equipment (PPE), face masks, ug mga disinfection supply para pagpangandam sa hinay-hinay nga transisyon gikan sa Enhanced Community Quarantine (ECQ) ngadto sa Modified ECQ ug sa kadugayan sa General Community Quarantine (GCQ).
Kagahapon sa hapon, gipahibalo sa Malañang Palace nga ang Laguna, mga dagkong dakbayan sa National Capital Region, lungsod sa Pateros, ug ang Cebu City gipaubos na sa Modified Enhanced Community Quarantine (MECQ).
Matud pa ni Presidential Spokesperson Harry Roque, kining mga lugara gipaubos sa MECQ tungod kay padayong taas ang ilang mga kaso sa Covid-19.
Ang MECQ magsugod karong Mayo 16 ug matapos karong Mayo 31.
Ang mga lugar kung diin mikunhod na ang kaso sa virus gipaubos na usab sa General Community Quarantine (GCQ). (LBG)
