DAKBAYAN SA OZAMIZ (Hulyo 18) —- Patay ang usa ka public school teacher human kini pusila sa makadaghang higayon sa riding in tandem, alas 4 sa hapon, Martes, Hulyo 17, 2018.
Ang biktima giila sa Ozamiz City PNP nga si Gregorio Leonard Madlos, 48, minyo, public school teacher sa Labinay National High School sa Ozamiz City ug nagpuyo sa Purok 5, Malaubang, Ozamiz City.
Ang krimen nahitabo, baynte metros lang gikan sa Labinay National High School.
Naigo usab sa saag nga bala ang kauban ni Madlos, samtang sila nanagan tungod sa kalisang.
Nasayran nga napagan sa maong pagpamosil ang mga magtutudlo nga nailhang si Helen Cabigas, 48, ug nagpuyo sa Tinago, Ozamiz City.
Natapsingan kini sa iyang walang bitiis si Cabigas. Hinungdan nga dali nga gidala sa MU Medical Center ug naa na sa luwas nga kahimtang.
Base sa imbestigasyon, ang biktima ug iyang mga kaubang magtutudlo nag-atang og masakyan alang sa pagpauli sa may National Highway, sa dihang kalit lang nga may mitawag sa ngalan sa biktima ug sa iyang paglingi,  kalit lang kining gipusil sa suspek nga ka-angkas sa usa ka motor.
Nakadagan pa ang biktima og mga lima ka metros, apan mikanaog ang suspek sa motor ug gigukod pa si Madlos og giposil sa makadaghang higayon.
Human krimen, dali nga mibalik sa pagsakay sa motor single ang suspek ug mipahilayo sa wala pa matinong direksiyon.
Nakaangkon og tulo ka pinusilan sa ulo ug nawong ang biktima, hinungdan sa iyang hinanaling kamatayon.
Na-recover gikan sa crime scene ang unom ka fired cartridge ug us aka slug sa caliber .45 nga posil.
Padayon pa ang gihimo nga investigation sa Ozamiz PNP sa maong panghitabo.
Dili usab makatuo ang kauban sa trabaho sa maong maestro sa nahitabo niini tungod kay buotan ug walay kontra sa ilang trabahuan.
Gipadayag ni Porferio Cagoco, co-teacher sa biktima nga nasakitan sila sa maong hitabo tungod kay giisip na usab nila kini nga higala ug buotan sa iyang trabaho.
Sama usab niini ang gipadayag ni Loreto Suazo, retired teacher ug higala sa biktima. Sumala pa niya , naguol sila sa maong hitabo ilabina nga naila nga buotan kini.
Naka-half-mast usab ang Labinay National High School gumikan sa insidente.
Wala mohatag og pahayag ang mga tangtungod sa biktima may labot sa maong insedente.-Neptalie Batolenio/NewsLine.ph
