DAKBAYAN SA DABAW (Hulyo 21)— Gisulayan ug sunog sa wala pa mailhing mga suspeks ang bag-o pa lang nahuman nga Community Police Assistance Center (Compac) didto sa Lambayong, Sultan Kudarat niadtong Biernes.
Sumala ni Kapitan Herman Luna, hepe sa Lambayong town police chief, gibubo-an ug gasoilna ug giduslitan sa upat ka tawo ang bag-o palang nahuman nga bilding, apan nadali kini ug palong sa residente sa maong lugar.
Gani matud pa ni Luna, gigukod sa nagpakabanang katawhan ang mga suspetsado , apan wala na nila kini naapsi.
Gipaspasan ug basya ug tubig sa mga tao ang bilding samtang nagpaabot nga moabot ang bombero, saysay ni Luna.
Ang lugar gibutangan sa kapulisan ng Compac post, tungod kay daghan krimen ang nagapanghitabo didto, tungod kay kani ang bundary sa barangay sa New Cebu ug Tinumiguez
Dili pa lang dugay, gi-implementar sa munisipyo ang “No ID, No Entry” nga balaud tungod sa taas nga rekord sa krimen, gani, niadtong Mayo didto usab gipatay ang kandidato pagka-mayor ug ug dunay pay usa ka empleyada sa gobierno nga didto usab gipatay.
Sumala ni Luna, ang pagsunog sa outpost, usa ka timailhan nga dili gusto ang mga kriminal nga mabantayan ang ilang mga lihuk.
SI Mayor Florante Agduma, mohatag ug ganti alang sa mga tao nga makahatag ug inpormasyon nga mailhan ang mga suspetsado sa daghang krimen sa iyang lungsod.-jap/NewsLine.ph
