DAKBAYAN SA DABAW — Patay si Patrolman Jhon Paul J. Gerida, 28, membro sa 2nd Provincial Mobile Force Company, human kini misukol sa dihang gigukod sa iyang kaubang mga pulis niadtong Domingo alas 10:35 sa buntag, Disyembre 8, 2019 didto sa Purok 5, Consuelo, Bunawan, Agusan del Sur.
Sumala sa report ni Police Staff Sergeant Gil Ursos, naglusad og hiniusang operasyon ang PNP Bunawan, Agusan Del Sur Provincial Intelligence Battalion, 1st ug 2nd Mobile Force Company, 1303rd Regional Mobile Force Company ug Regional Special Operations Group, batok ni Gerida human niini gipusil sa iyang company commander nga si Lt. Col. Rex Lomente niadtong Disyembre 6, didto sulod sa opisina sa 2nd PMFC Barracks, Purok-1, Bunawan Brook, Bunawan, Agusan del Sur niadtong Disyembre 6, 2019 banda alas 9:25 sa gabii.
Og Niadtong Domingo sa buntag nakita siya sa mga operatiba, apan imbis nga mosurender nakigpinusilay kini hinungdan nga mibalos ang kapulisan ug naigo ang iyang ulo, hinungdan sa iyang hinanaling kamatayon.
Napalgan sa crime scene ang usa ka ponto caliber .45 nga pistola nga may serial no. A004311, usa ka magazine kargado’s mga bala ingon man duha ka basiyo sa napabutong mga bala sa caliber .45.
Sa pasiunang taho sa Caraga PNP, Nakig-istorya kuno si Lomente kang Gerida sulod sa opisina dihang nabati ang buto sa armas. Daling misulod ang kapulisan sa opisina sa ilang commander ug ilang napalgan nga nagkadugo si Lomente ug may samad pinusilan sa iyang tuo nga agtang.
