Pulis sa Davao gipusil patay

DAKBAYAN SA DABAW, Pilipinas — Usa ka membro sa Davao City Police Office ang gipusil patay kaganihang buntag sa wala pa mailhing mga armadong grupo.

Ang pulis nailhan nga si PO3 Wilfredo B. Garol Jr. 34 anyos ug molupyo sa Rubber Village sa distrito sa Calinan ug kasamtangan nga nadistino sa Baguio police precinct.

Ang kadagkuan sa kapulisan sa rehiyon nagtuo nga mga membro sa rebeldeng New People’s Army ang mipatay kang Garol.

Sumala sa taho sa kapulisan, gikan naghatud si Garol sa iyang asawa nga maestra mga 7:45 sa buntag.

Pauli na si Garol sa dihang dunay duha ka lalaki ang mi-angkas sa iyang motorsiklo ug pag-abot nila sa purok 5, sitio luman sa barangay New Valencia, Tugbok District ilang gipusil ang pulis.

Gitagud-tagud ang laawas ni Garol sa mga bala hinungdan sa iyang hinanaling kamatayon.

Si Garol matud pa usa sa mga intillegence personnel DCPO.

Ang mga kauban ni Garol nagbutyag nga nakadawat na si Garol ug mga inpormasyon nga daghan daw nag atang kaniya doul sa eskwelahan sa iyang misis apan wala kini niya panumbalinga.

Gikundena gilayon  ni Police regional director PCSupt Manuel Gaerlan  ang kamatayon ni Garol.

“Akong gikondena ang walay po-angod ug tinalawan nga pagpatay kang  PO3 Wilfredo Garol sa suspetsadong mga armado,” Matud pa ni Gaerlan.

Si Garol, matud pa ni Gaerlan “Usa ka buotan nga opisyal sa pulis ug mapinalang-gaon nga bana.”

“Kini nagpakita lamang nga wala gi-respeto sa mga rebelde ang tawhanong katungod sa katawhan,” sumala pa ni Gaerlan.

Gidala sa mga suspetsado ang .45 nga pistula ni Garol ug ang iyang motor.

Gipangita pa sa kapulisan ang mga suspetsado sa pagpatay kay Garol.-Harold V. Pontongan/Newsline.ph