DAKBAYAN SA DABAW— Nagkadaiyang mga diskarti ang gihimo sa mga sakop sa Davao City Police atol sa pagsaulog sa Valentines Day kagahapong adlawa, Pebrero 14, 2021.
Gawas sa pagpatuman sa mga health protocols sa mga quarantine checkpoints, ang mga pulis sa Baguio Police Station nangharana ug nanghatag ug bulak nga dunay mga hugot lines ngadto sa mga tawo ug sa mga motorista.
Nanghatag sab ug bulak ang mga sakop sa Calinan Police Station, dili lang sa mga muagi sa checkpoint apan asta sa mga stakeholders sa ilang area of responsibility nga ilang giadto sa mga balay.
Mga priso sab sa Sta Ana Police Station ang ilang gihatagan ug bulak nga dunay pakapin nga love message.
Mga motorista, street vendor ug mga gikan sa simbahan ang gihatagan ug bulak sa Bunawan Police Station.
Samtang na-surprisa ang mga babayeng mitambong sa coronavirus awareness response activity sa dihang gihatagan sila ug bulak sa mga sakop sa Marilog Police.
Way dakop nga nahitabo gahapon adlawa, tungod kay dili kulba ang gipabati sa mga sakop sa traffic group ngadto sa mga motorista kundili gugma pinaagi sa paghatag ug bulak nga dunay pakapin nga mga hugot lines may kalabutan sa traffic laws.
Ug pinasahi ang gihimo sa San Pedro Police Station tungod kay dili lang bulak ang ilang gihatag ngadto sa mga tawo kundili duna say bugas ug delata.Nahuman ang adlaw sa Valentines Day gahapong adlawa nga ‘way mga dagkong kakulian ang nahitabo sa tibuok syudad.-Cheche Diabordo
