DAKBAYAN SA DABAW (October 12) — Opisyal nang mipasaka sa iyang Certificate of Candidacy si Presidential son Paolo “Pulong” Duterte sa buhatan sa Commission on Elections (Comelec) kaganinang udto.
Gikuyugan si Pulong sa iyang manghud nga si Davao City Mayor Sara Duterte ug iyang bayaw nga si Attorney Mans Carpio sa iyang pag-adto sa Comelec.
Basi sa mga taho, dugay nang gitagaan ug pagtugot sa pamilya Duterte ang pagdagan ni Pulong.
Midagan si Pulong isip opisyal nga kandidato sa Hugpong sa Tawong Lungsod, ang lokal nga partido sa iyang igsoon ug amahan.
Una niini, mi-iway na si PBA Partylist representative Jericho Nograles aron wala kunoy kalaban si Pulong.
Unang gibaniog nga mopuli si Jericho sa iyang magulang nga si Congressman Karlo Nograles sa unang distrito, tungod kay mahuman na ang termino niini sa 2019.
Apan, kagahapon, mipasaka na sa iyang kandidatura si Nograles isip kandidato sa PBA Partylist.
Sa pakighinabi sa media, gibutyag ni Pulong nga ang iyang pagdagan, adunay pagtugot sa iyang inahan nga si Elizabeth ug iyang manghud nga si mayor Sara.-NewsLine
