DAKBAYAN SA DABAW —- Temporayong ipasira ang buhatan sa Radio Television Malacañang (RTVM) sukad sa Martes Hulyo 28, hangtud sa Agosto 11 aron himoun ang disinfection human duha ka empleyado nagpositibo sa coronavirus-19.
Tungod niini, pipila lang ka empleyado ang mouban sa mga lakaw ni Presidente Rodrigo Duterte.
Sa usa ka sulat pahayag, nga gilagdaan ni RTVM executive director Demic Pabalan, iyang gipahibalo nga ang ilang buhatan nga anaa sa Presidential Broadcast Staff-RTVM building doul sa Malacañang complex, dili una modawat o magpagawas og mga dokumento ug dili usab modawat og mga bisita.
Ang operasyon sa RTVM moabri sa publiko sa Agosto 12.
Ang duha ka empleyado, pulos wala nagpakita ug sintomas, apan ang mga pesonahe nga ilang nakauban gipailawon na usab sa swab testing noadtong Biernes ug ang ubang empleyado gimanduan nga magpailawom sa 14-mandatory quarantine.
Ang duha ka personahe sa RTVM, naapil sa 25 ka aktibong kaso sa Covid-19 nga naka-infect sa mga personahe sa Presidential Communications Operations Office ug sa mga kaubang ahensya niini.
