DAKBAYAN SA DABAW (Oktobre 6) — Opisyal nang gipaundang ang pakotkot sa posibleng natabunan sa landslide didto sa Ground Zero sa Naga, Cebu kaganinang buntag.
Setentay otso (78) ka tawo ang namatay sa landslide ug paspas nga pagdahili sa yuta niadtong Septembre 20, apan duna pay wala makita nga upat ka lawas.
Usa ka misa ang gipahigayon didto sayo sa buntag alang sa mga biktima sa ‘landslide’ niadtong Septembre 20.
Si Naga City Mayor Kristine Chiong nagpadayag nga opisyal ng gitapos ang search and retrieval operation.
Ang pag anunsyo ni Chiong gihimo kauban ang mga kadagkuan sa Bureau of Fire Protection (BFP 7), Office of Civil Defense (OCD), ug Provincial Disaster Risk Reduction Management Office (PDRRMO) , kabahin sa deklarasyon sa pagpahunong sa search and retrieval sa nahitabo nga landslide.
Matud ni Chiong, “Dili na jud safe ang ground zero, dili na safe sa rescuers, ang MGB (Mines and GeoSciences) strongly recommended kung mahimo moundang na ta sa retrieval, taas na kaayo ang kubkub, Ako mohangyo nga ihunong na.”
Gani,. matud pa ni Choing “Kung naay makit-an inig implementar sa hazard reduction plan, ug naay ma recover, ipahibalo namu kini sa publiko, sa pagka karon wala pa ang geohazard assessment.”
Una niini, misaad si Presidente Rodrigo Duterte nga tabangan sa goberno ang mga residente nga nawad-an ug panimalay ug sila ihikling sa safety nga lugar.-Harold V. Pontongan.-NewsLine.ph
