DAKBAYAN SA DAVAO-— Nangita og hustisya ang pamilya sa singer nga si Arnold Dasan Masamloc, 28 anyos, residente sa Purok Pag-Asa, Poblacion Matanao, Davao del Sur, human kini nakita nga patay na, sa daplin sa sapa kagahapon.
Matud sa pamilya, wala na makapauli si Masamloc niadtong Sabado sa Gabii ug kagahapon nakita nalang sa daplin sa sapa sa lungsod sa Magsaysay, Davao del Sur ang iyang patayng lawas.
Sa report sa Bansalan PNP, gisaysay niini nga posibleng nalumos si Masamloc ug nakita ni Lydia Agdan ang patayng lawas sa kasagbutan doul sa sapa samtang gikan ang babaye nagpakaon sa iyang mga bebe..
Apan, natingala ang pamilya, kung nalumos, nganong wala man miburot ang iyang tiyan, ug nganong napuno sa bug-og ang iyang lawas?
Sa pahayag ni Cpl. Jovelyn Lorente sa Newsline, iyang gisaysay nga base sa ilang inisyal nga imbistigasyon, posibleng nalunod kini gikan sa taas nga bahis sa sapa sa Matanao ug naanod paingon sa sapa sa Magsaysay kay matud sa mga residente sa daplin sa sapa taas ang tubig baha niadtong Sabado sa gabii.
“Sa among nakita, murag naanod lang ang lawas niya sa sapa kay taga Matanao man to unya ang sapa sumpay sa sapa sa Magsaysay. Ang mga pasa-pasa’ ug bun-og sa lawas tungod to sa mga bato nga nabandahan sa iyang lawas, wala sab siyay samad nga agi og mga hait nga butang,” saysay ni Lorente.
Kay dunay pagduda ang pamilya, matud sa kapulisan, andam sila nga palawman ang imbistigasyon aron ilang matunol ang hustisya ug mga tubag sa mga pangutana sa pamilya.-NewslinePhilippines
