DAKBAYAN SA DABAW — Kapin usa ka libo na ka mga residente sa Davao Region ang natabangan sa Davao City Government nga makapauli gikan sa ilang pagkatanggong sa lain-laing dapit sa nasud.
Sulti ni Mayor Sara Duterte nga moabot na sa 1,045 ka mga Dabawenyo ang nakauli na sa ilang panimalay sukad Abril 29, samtang 2,455 na usab ka mga indibidwal ang ilang natabangan og pauli ngadto sa ilang mga probinsiya.
Kagahapon sa Lunes, Mayo 25, usa ka “sweeper flight” miabot gikan sa Cebu sakay ang 54 ka mga Dabawenyo.
Sa 54 ka mga pasahero, 51 niini mga residente sa dakbayan, duha mga taga-Kidapawan City, ug usa taga-Samal City.
Ang mga bag-ong nangabot natanggong sa Cebu, kung diin adunay 1,800 ka mga kaso sa coronavirus disease (Covid-19) sa pagka karon. Sila na-stranded sa Cebu sukad nga gidili ang pagbiyahe sa eroplano niadtong Marso.
Samtang padayon ang dakbayan sa pagdawat og mga Dabawenyo nga gikan sa laing mga lugar, si Inday Sara nag-ingon nga duna sila’y giandam nga sistema kon ugaling adunay magpositibo sa Covid-19 sa mga mipauli nga residente.
“I-expect lang pud ninyo nga duna gyuy mag-positive sa ilaha, because walay tambal/bakuna, motuyok ang mga tao, motuyok gyud na ang kagaw. But ang importante duna ta’y sistema [sa health screening] nga naandam sa pag manage sa Covid-19,” saysay sa mayor.
Sama sa mga nag-unang namauli sa Davao, ang tanang pasahero nga miabot sa Lunes gipaubos sa Rapid Diagnostic Test (RDT) ug uban pang mga eksaminasyon para pagsuta kung aduna ba sila’y mga sintomas sa Covid-19.
Wala hinuoy nagpositibo sa mga Dabawenyo nga miabot sa Lunes, matud pa ni Dr. Josephine Villafuerte sa City Health Office. (LBG)
