DAKBAYAN SA DABAW — Subling abrihan sa Southern Philippines Medical Center (SPMC) ang uban niining departamento sa sunod bulan sa Hulyo, apan, hugot niining ipatuman ang mga regulasyon aron malikayan ang pagtakud sa Coronavirus-19 (COVID-19) sa mga pasyente.
Sukad niadtong Marso, gipasira sa SPMC ang uban niining departmento kay gitutukan niini ang pagtubag sa mga pasyente nga natakdan sa Covid-19.
Dr. Ricardo Audan, chief of medical professional staff sa SPMC, dili kinahanglan magpabilin nga sirado ang ubang departamento tungod kay daghang pasyente ang nanginahanglan og medical nga atensyon.
Karong Hulyo 1, abrihan na sa SMPC ang elective surgery. Sumala ni Audan, sa pakighinabi sa PTV-Davao niadtong Lunes, Hunyo 29.
Adunay mga rekisitos nga kinahanglan sunod sa paghinayhinay og abri sa ubang departamento, sama sa pagpaniguro nga negatibo sa Covid-19 ang mga pasyente nga ilang atimanon ug pasudlon.
Dili modawat og walk-in nga pasyente ang maong hospital, kinahanglan adunay appointment o na-eskedyul na una moadto didto aron operahan.
Apan una himoun ang operasyon, kinahanglan nga mag home quarantine una ang pasyente sulod sa 14 ka adlaw, pagkahuman ipailawon kini sa rapid test, kung mag-negatibo himoun ang operasyon, apan kung magpositibo kini, dalahon gilayon kini sa isolation facility, dugang ni Audan.
Ang mga doctor ug uban pang personahe nga anaa sa departamento ipailawom usab sa rapid test aron mapaniguro nga luwas sila sa covid-19.
Unahon pag-abri ang elective surgery department, isunod ang orthopedics, optalmology ug ang EENT ug magsunod na ang ubang departmento, matud ni Audan sa iyang pakighinabi sa PTV- Davao.-Newsline
