ANG KANHI National Basketball Association (NBA) star nga si Patrick Ewing nakagawas na sa tambalanan ug padayong nagpaayo gikan sa coronavirus disease (Covid-19) sa ilang balay.
Kini ang gipahibalo sa iyang anak nga si Patrick Ewing Jr. gahapon sa Lunes, Mayo 25.
Matud pa ni Ewing Jr. sa Twitter, arang-arang na ang kahimtang sa iyang amahan human nagpatambal sa usa ka hospital.
“My father is now home and getting better. We’ll continue to watch his symptoms and follow the CDC (Centers for Disease Control) guidelines. I hope everyone continues to stay safe and protect yourselves and your loved ones,” sulti ni Ewing Jr.
Si Ewing Jr. nagpasalamat sa mga doktor ug nurse nga miatiman sa iyang amahan samtang siya nagpatambal sa hospital.
Nagpasalamat usab siya sa mga fans sa iyang amahan sa ilang mga pag-ampo human gi-anunsyo ni Ewing Sr. ang resulta sa iyang test.
Niadtong Biyernes, Mayo 22, gibutyag sa 57-anyos nga kanhi magdudula sa New York Knicks nga siya nagpositibo sa coronavirus ug na-admit sa hospital para magpatambal.
Si Ewing karon nag-coach na sa iyang college alma mater nga Georgetown Hoyas sa National Collegiate Athletic Association (NCAA).
Sa iyang panahon sa Georgetown, gitabangan sa 7-foot nga Ewing ang Hoyas nga maangkon ang kampyonato sa NCAA niadtong 1984.
Pagka sunod tuig, gikuha siya sa New York Knicks isip “No. 1 overall pick” sa 1985 NBA draft.
Niadtong 1994, gidala ni Ewing ang New York Knicks sa NBA Finals, kung diin sila gilupig ni Hakeem Olajuwon ug sa Houston Rockets alang sa korona.
Si Ewing nakadula og 17 ka season sa NBA, ug 15 niini sa Knicks.
Human siya ni retiro, si Ewing nagsilbing assistant coach sa upat ka NBA team sulod sa 15 ka tuig.
Nahimo siyang head coach sa Georgetown niadtong Abril sa 2017. (LBG)