DAKBAYAN SA TAGUM (Hunyo 22) — Samdan ang usa ka sundalo nga nailhang si Private Arjay Pascasio human kini maigo sa ulo atol sa engkuentro tali sa mga sakop sa Militar ug New People’s Army, didto sa Sitio Tibucag Barangay Dagohoy, Talaingod Davao Del Norte Huebes sa buntag, June 21, 2018.
Ang binakbakay sa duha ka armadong grupo nahitabo doul sa Tibucag Integrated School.
Sumala ni Capt. Jerry Lamosao, tigpamaba sa 10th Infantry Division, duna silay nadawat nga sudlon sa mga sakop sa NPA ang mga eskwelahan arun manghasi, hinungdan nga mipahigayon sila ug combat patrol arun mapugngan ang plano sa mga rebelde.
Ang engkuentro nahitabo pipila ka metro lang gikan sa Tibucag Integrated School.
Gibutang sa Neil Tuyco sa iyang facebook, ang video diin makitang nanghapa sa salog sa tulunghaan ang mga bata nga nag eskuela sa Tibucag Integrated School ug madunggan ang pagbinayluay ug buto tali sa mga sundalo ug rebelde.
Way naagin nga sibiliyan atol sa engkwentro, samtang gidala sa balay tambalanan sakay sa military chopper si Private Pascasio.-Reeya Nuñez/NewsLine.ph
