DAVAO CITY — Nasikop sa mga sundalo sa gobyerno ang supply officer sa komunistang 5 New People’s Army (NPA) niadtong Lunes, Abril 13, didto sa lungsod sa Mabini, Davao de Oro.
Sigun ni 2Lt. Kim Carlos, civil-military operations officer sa 71st Infantry Battalion (71IB) sa Philippine Army, ang nadakpang rebelde giila nga si Samuel Elemino Jr., usa ka supply officer sa Guerilla Front 2 sa NPA.
Ang Guerilla Front 2, sumala pa ni Carlos, nag-operate sa mga lungsod sa Mabini, Pantukan, Mawab, ug Maco sa Davao de Oro.
Nasikop si Elemino sa Barangay Cadunan tungod sa gipahingusgang pag-implementar sa enhanced community quarantine sa maong lungsod sa mga taga Armadong Kusog sa Pilipinas (AFP) ug sa Philippine National Police (PNP).
“Sa wala pa siya (Elemino) madakpi, daan naming gipahibalo sa mga taga-tribu sa presensiya sa mga rebelde sa ilang ancestral domain,” sulti ni Carlos kagahapon, Abril 15.
Dugang pa ni Carlos nga ang AFP ug PNP naghimo og “joint Covod-19 defense patrol” human sa mga taho sa mga sibilyan sa kanunay’ng pangilkil sa mga rebelde sa kabukiran.
Pipila na ka lumolupyo sa Mabini ug Pantukan ang napugos pagbiya sa ilang mga panimalay ug umahan tungod sa presensiya sa mga rebelde.
Matud pa ni Carlos, si Elemino usa sa mga NPA nga na-engkwentro sa militar niadtong 2018 ug 2019 sa Mabini.
Sa laing bahin, si 71IB commander Lt. Col. Sonny Gonzales misaad nga ang militar dili moundang sa pagpakgang sa mga dautang buhat sa NPA nga makaapektar sa kampanya sa gobyerno nga masumpo ang Covid-19 pandemic.
Si Elemino kasamtangang naa sa kustodiya sa PNP, samtang ang 71IB nangita og paagi nga makahatag og tabang pinansiyal sa pamilya sa nadakpang rebelde. (LBG)
