Flyover project aprobado ni Dolfo del Rosario: Mayor Rellon

Posted on

DAKBAYAN SA TAGUM (Enero 26) — Dili angayan nga sawayon ni kanhi Gobernador Rodolfo del Rosario ang P2.6-bilyones nga flyover project ning dakbayan, tungod kay iya kining gi-aprobahan, kini ang saysay ni  Mayor Allan Rellon.

Sumala ni Rellon “Gi-aprobahan ni del Rosrio ang proposal, niadtong Gobernador pa siya,  ni-agi na sa iyang opisina ang proposal, natingala ko nga karon iya na man hinoun gisaway.”

Sa pakighinabi sa membro sa media atol sa inagurasyon sa Fe Village sa Purok Abaca, sa  Barangay Mankilam niadtong Biernes, Enero 25, gibutyag ni Rellon “Ang tanang detalye, plano, ug mga butang kabahin sa flyover,   miagi sa iyang buhatan, kay moagi man gyud sa buhatan sa Gobernador ang Annual Implementing Plan (AIP) sa matag lokal nga panggamhanan, gani, iya kining gi-aprobahan.”

“Tanang proseso, tanang legal nga pamaagi ang gisunod, kay di ko gusto magka problema pag abot sa panahon, natingala lang ko, nganong karon sige sya ug pangutana ug sige ug panaway sa proyekto, basin nakalimot sya nga iya ning gitagaan ug pagtugot,” butyag ni Rellon.

Una niini, nagyawyaw si Del Rosario Sr., ang flyover project kuno nga gipasugdan ni kanhi House Speaker Pantaleon “Bebot” Alvarez dili kuno panginahanglanon.

Midugang si del Rosario, nga ang proyekto, dili solusyon sa nagkalala nga problema sa trapiko sa syudad, gani, ang iyang sugyot, madugang nalang ug traffic lights ug magdugang ug traffic enforcers.

Apan, tubag ni Rellon,’ Basin nakalimot sya nga siya nag-aproba anang flyover, natingala jud ko nganong nikalit sya ug panaway sa proyekto nga iyang gi-aprobahan , basin tungod ni sa bulok sa politika, tungod kay dili na mi alyado, kung kana ang hinungdan aning tanan, mahasubo ko, tungod kay kanang proyekto alang man sa katawhan ug dili lang para niya, dili man gud niya mabati ang problema sa trapiko kay hamugaway man iyang pagpuyo, unya dili man sya, moagi-agi aning karsada.”

Ang paghimo sa flyover, matud pa ni Rellon, usa ka solusyon ug pagpangandam sa problema sa trapiko, tungod kay nagkadaku na ang syudad ug gani paspas na ang paglambo sa ekonomiya, rason, nga angay pangandaman sa lokal nga panggamhanan.

Sa iyang katawhan, si Rellon nag-aghat, ” Padayonon natu ang atong panaghiusa, alang sa kalambuan sa atong syudad, kay inyo kung gitagaan ug pagsalig og mandato nga manerbisyo kaninyo, ako maningkamot nga kamo akong maserbisyohan, dili ta magpadala sa politika, kung naay moy angay isumbong o ikasaway sa panggamhanan, palihug ipadayag  ninyo, tingog kamo, kitang tanan, adunay katungod nga magpasibaw.’

“Ako nanerbisyo alang sa habagang dout sa katawhan, dili sa pipila lang ka interes,” dungag ni Rellon.

Kanhi kauban sa politika si Rellon ug del Rosario, apan nagbuwag sila karon kay si del Rosario mitabok sa Hugpong ng Pagbabago, ug si Rellon, nagpabilin sa PDP-LABAN.

Si Rellon misuporta sa kandidatora ni kanhi Speaker Pantaleon Alvarez, nga kalaban sa anak ni del Rosario nga si Anthony,  nga nagpapili pagka-Kongresista sa unang distrito dinhi sa dakbayan.-ezc/Newsline.ph

Be informed
  •  
  •  
  •  
  •  
  •  
  •  
  •  
  •  
  •