Abogadong nanabi nga mabayran ang korte gitanggalan ug lisensya sa Korte Suprema

Posted on

DAKBAYAN SA DABAW (Hulyo 5) — Gitanggalan ug lisensya sa Korte Suprema ang usa ka abogado ug dili na kini makapraktis sa iyang propesyon human nasuta nga iyang gipanabi sa iyang kleyente nga mabayaran ang korte.

Matud sa rekord sa Korte Supreme si Attorney Jose A. Diño Jr., ang kanhi abogado sa Vintage Lighting Philippines Inc., nangayo kang Ma. Cecilia G. Roque, Bise Presidente sa Vintage Lighting Philippines ug P150,000 aron kuno ipagawas sa huwes ang Temporary Restraining Order nga ilang gipangayo sa korte.

Gibatbat ni Mrs. Roque ug Vintage, nga niadtong Septiembre 5, 2006, giingnan sila ni Atty. Diño nga kinahanglan sila mobayad ug P150,000 aron isuhol sa Huwes nga nagunit sa ilang kaso aron masiguro nga ipagawas sa Temporary Restraining Order (TRO).

Mihatag ang Vintage, pinaagi ni Roque kang Diño ug P20,000, kay nagtuo kini nga legal ang maong bayronon.

Niadtong Septiember 19, 2006, nigawas ang TRO.

Sa dihang, gipangayo na ni Diño ang balanse nga P130,000.00, gi-ingnan siya ni Roque nga maghulat kay iyang pahibal-on ang kompanya. Apan gikasuko kini ni Diño ug didto nagsugod ilang kasamok.

Mipasaka na ug nagkadaiyang kaso si Diño batok kang Roque ug sa Vintage.

Si Roque ug John Paul Fairclough mipasaka usab ug ‘disbarment case’ batok kang Diño.

Sa desisyon nga gipakanaug sa Korte Suprema nga gipirmahan ni Associate Justice Francis Jardeleza, iyang gibutyag nga napamatud-an nga nakalapas o ‘guilty’ si Atty. Diño sa mga pasangil sa Vintage Lighting Philippines Inc.

Gimansahan kuno ni Diño ang imahe sa hudikatura tungod sa iyang pagpangayo ug kuarta sa iyang kleyente aron isuhol sa korte.

Sa desisyon sa Korte Supreme, gibutyag niini nga nakalapas si Diño sa 13 ng Code of Professional Responsibility, rason nga angayan syang tanggalan sa iyang lisensya.-Jiann A. Padillo/NewsLine.ph

Be informed
  • 115
  •  
  •  
  •  
  •  
    115
    Shares
  • 115
  •  
  •  
  •