Pagbisita ni Briones sa hilit nga lumad skul sa Talaingod gikalipay sa kumunidad

Posted on

DAKBAYAN SA TAGUM — Dili masukod ang kalipay nga gibati sa mga estudyante ug katawhan sa hilit nga sitio sa Nasilaban, Palma Gil sa munisipyo sa Talaingod sa dihang gibisita sila ni Department of Education (DepEd) Secretary Leonor M.  Briones.

Halos dili katuo ang kumunidad nga niaabot si  Briones sa ilang lugar ug nakigtagbu sa mga estudyante ug mga ginikanan niadtong milabayng Biernes , Agosto 8.

Personal nga nakita ni Briones ang mga panginahanglanon sa mga maestra ug estudyante, gani misaad kini nga dugangan niya ang mga lawak tulunghaan ug dugangan ang mga bangko ug iyang paabrihan ang kinder.

“Natuman na gyod ang akong damgo nga maka-abot sa Talaingod. Mianhi ako dinhi aron makita nako personal ang mga eskwelahan, makatan-aw ko sa mga hitsura sa mga bata, mga titser; kay ako usa usab ka titser mao nga nakasabot sa sitwasyon sa mga titser, sitwasyon sa Division,” matud ni Broines.

Matud ni Briones, maski hilit na ang Talaingod, apil gihapon kini sa kinatubuk-ang paglambo sa natud sa edukasyon, gani iyang gipaniguro “Unahon natu nga makumpleto ang mga ang-ang gikan sa kindergarten hangtud sa senior high school ug butangan ug program nga technical and vocational school. Ang mandu sa batakang balaud mao nga hatagan ug kaalam anng kabatan-unan ug katawhan, ug kini akong ipatuman dinhi sa Talaingod ug sa tibouk kapupud-an.”

Ang mga mograduar sa technical ug vocational nga kurso puede na manarbaho bisan sa laing nasud kung aduna na silay katakos ug kaalam silang motrabaho dayon pagka-graduate nila.

Iyang gibutyag nga adunay padayong panagsabot ang Civil Service Commission (CSC) ug DepEd nga ang mga gradwado sa Senior Highschool mahimong dawaton na sa gobyerno sama sa mga pribadong trabahoan. 

Gipahibalo sab ni Briones nga hatagan nila ug saktong suporta ang ga gi-ingong “Last Miles” schools, mao kini ang mga eskuylahan nga wala makit-i, napasagdan ug wala mahatagi ug hinabang nga kinahanglang unahon ilabina kay kadaghanan niini anaa sa mga Lumad nga dapit samtang wala pa matapos ang iyahang termino ug kang Presidente Rodrigo Duterte. 

“Ang atong plano ayohon ang duha ka classrooms himoon natong dormitory. Mag-construct ta ug three-storey building, siyam ka classroom. Tungod kay problema ang tubig, (maghimo) rain-water collector . Solar panel kay wala man ta’y connectivity, 24th century classroom, ang blackboard electronic, kada bata naay computer . I-rip-rap nato mga buildings, mga surroundings. Ato gyod ning paningkamotan, dili nato ni biyaan,” pagtug-an sa Secretary nga gikalipay pag-ayo sa mga Lumad. 

Hinuon dunay “kondisyon” ang DepEd Secretary alang sa mga Lumad.
“Nga ang atong mga kultura, sinultihan kinahanglan ato nang ampingan, ipadayon; dili nato biyaan ang atong biste, mga sayaw, ang inyong identity.”

Gisuportahan ni Briones ang mga proyektong pang-edukasyon ni Davao del Norte Governor Edwin Jubahib kay matud niya, kinahanglan mahatagan ug saktong suporta ang mga kabatan-onan sa kabanikanhan.

Matud ni Briones dili angayang ikaulaw sa mga estudyante ang ilang tribu, kaagi, inestorya, mga awit; “Dili nato na kalimtan even as we progressed. . Dili ta kalimot nga kita mga indigenous people, mga Lumad, aduna’y mga paagi sa pag-desisyon, pagtahod sa mga may-edad na, dili nato ni i-bura. . Manaad ko nga usa mahuman ang among termino, matuman ang among saad,” pagtapos ni Secretary Briones uban ang dakong pasalamat.

Ang Palma Gil nahimong hisgutanan sa mga balita niadtong milabayng tuig tungod kay didto naggikan ang mga estudyante nga gi-aghat kuno sa rebeldeng grupo nga mosalmot sa rebulusyonaryong kalihukan.-NewsLine ug PIO DavNor

Be informed
  • 144
  •  
  •  
  •  
  •  
    144
    Shares
  • 144
  •  
  •  
  •