DAKBAYAN SA CEBU — Usa ka lalake nga taga Digos, Davao del Sur ang napalgang patay sa lungsod sa Balamban,Cebu niadtong Martes sa gabii, Agosto 20.
Giila sa kapolisan ang biktima nga si Armando “Max” Bernaldez Oppus pinaagi sa iyang passport nga nakuha sa sunog barangay diin nakit-an ang iyang lawas.
Si Oppus giingong chief executive officer sa Crowd Royals Real Estate Services, usa ka investment scheme nga nagtanyag og “double your money” investment scheme, nagtago-tago sukad niadtong Hulyo 28, 2019.
Ang sakyanan ni Oppus napalgan sa sunod barangay diin nakit-an iyang lawas.
Si Police Major Christina Torres sa Balambang Police Station nagkanayon nga ang drivers license, passport ug ubang papeles nakuha sa Barangay Sunog diin gisunoh ang iyang sakyanan.
Ang lawas ni Oppus nga adunay mga samad pinusilan nakit-an daplin sa dalan sa Barangay Cansomoroy, sunod sa Barangay Sunog.
Sa pakisusi sa kapolisan didto sa Davao Police Provincial Office nasuta nga si Oppus ang duha ka kaubanan niini sa maong investment scheme ang nag atubang og kasong large scale estafa.
Ang reklamo batok ni Oppus og kaubanan nagkanayon nga nadala nila ang P400 milyones sa Crowd Royals Real Estates Services.
Si Oppus matud pa sa kapolisan sa Davao milayas sa Davao niadto pang Hulyo 28, kuyog ang tibuok pamilya.
Ang duha ka kauban ni Oppus nga nag atubang og samang kaso giila nga sila Edmond Barriga Quiñones ug Judy Ann Estrella.
Ang Crowd Royals Real Estates Services usa sa 22 ka mga investment schemes sa gilista sa Securities and Exchange Commission nga illegal og gipasira.