Kalabira sa mga gidagit sa NPA niadtong 2017, gikutkot sa Kitaotao, Bukidnon

Posted on

LUNGSOD SA KITAOTAO, BUKIDNON — Nakit-an na sa kabanay ang kalabira sa ilang minahal sa kinabuhi nga gidagit sa mga rebeldeng New People’s Army niadtong 2017, human kini gikutkot niadtong Biernes, Agosto 22.

Gikuyog sa 10th Infantry Division ug 89th Infantry Battalion kauban ang Scene of the Crime Operatives, ang pamilya sa mga biktima sa dihang gikutkot ang kalabira ni ‘retired’ Patrolman Joel Ray Galendez, 43, Sgt. Reynante Espana 42, og Dionisio Havana, 36 usa ka tribal leader sa Agusan del Norte.


Sumala ni 10th ID commanding General Maj. Gen. Jose Faustino Jr., nga gidagit ang mga biktima sa mga giilang membro sa NPA niadtong Agosto 22, 2017, sa Sitio Nabunturan, Barangay Kalagangan, San Fernando Bukidnon, kuyog ang 15 anyos nga anak ni Galendez, apan gibuhian kini human sa pipila ka bulan nga pagtago kaniya.

Gibutyag ni Faustino nga ilang natultulan ang lubnganan sa tulo human gitudlo ni alyas Dindo ang maong lugar.

Si Alyas Dindo miangkon nga nakakita siya gi-unsa pagpatay angmga biktima ug siya ang naglubong kanila.

Grabeng tiyabaw sa pamilya sa mga biktima sa dihang ilang nakit-an ang ilang minahal sa kinabuhi nga mga kalabira na. Apan, natuldukan na ang ilang pagpaabot sa sulod sa duka ka tuig.

Gibutyag ni Faustino nga gikilkilan sa mga rebelde ang pamilya sa mga biktima maskin kung sila patay na.

Naundang lang kuno ug pangayo ug kuarta ang mga rebelde, mga duha ka bulan ang milabay, human nasuta sa pamilya nga patay na ang ilang minahal sa kinabuhi.-Armando Fenequito Jr.

Be informed
  •  
  •  
  •  
  •  
  •  
  •  
  •  
  •  
  •