DAKBAYAN SA DABAW— Walay epekto ug wala maparalisa ang dagan sa transportasyon sa nasud bisan pa man sa gipasi-atab nga nationwide transport strike kagahapon Septiembre 30, tungod kay mga drayber na mismo ang wala mosuporta niini.
Gi-anunsyo sa grupong Pinagkaisang Samahan ng mga Tsuper at Operator Nationwide (Piston), members of the Alliance of Concerned Transport Organization (ACTO) og ang grupo sa Stop and GO nga sila magprotesta aron ipakita nila ang pagbabag sa planong ‘phase out’ o pagwala sa mga dyip sa kadalanan kay ilisan na kini ug bus, tungod sa ‘transport modernization program sa gobierno.”
Tungod sa maong hulga, nangandam ang Land Transportation Franchising and Regulatory Board (LTFRB) sa tibouk kapupud-an duyog ang mga lokal nga panggamhanan ug nagbutang kini ug mga sakyanan aron mohakot unta sa mga pasahero nga walay masakyan.
Gi-suspenso ang klase sa daghang eskuelahan sa Manila tungod sa kahadluk nga walay masakyan ang mga estudyante.
Apan, pakyas ang mga organisador sa pagkumbinsi sa mga tsuper kay wala kini naminaw sa ilang panawagan, gani, walay epekto ang gihimong ‘nationwide strike.’
Sa dakbayan sa Cebu, nagpabiling normal ang dagan sa mga sakyanan ug wala nabati ang epekto sa strike , kini sumala ni LTFRB-7 Regional Director Eduardo Montealto.
Wala sab mosalmot ang grupo sa mga drayber sa Antique ug agayan Valley tungod kay mas importante kuno ang ilang pamugas kaysa protesta, ug tungod kay adunay problema sa liderato ang maong sektor, sumala ni Jose Armamento, opisyalsa San Jose-Sibalom Public Utility Vehicle Operators and Drivers Association.
Sa Dakbayan sa Dabaw, walay nabati nga protesta ug nagpabiling normal ang kadalanan bisan pa man sa gipasi-atab ang strike.
Didto sa Cagayan de Oro, walay misalmot sa protesta tungod kay matud ni Director Aminoden Guro, sa LTFRB-10, nakasabot ang hut-ong sa mga drayer sa planong modenisasyon.-JAP/NewsLine.ph