DAKBAYAN SA COTABATO — IPAILAWOM Na sa panggamhanan sa Bangsamoro Autonomous Region in Muslim Mindanao (BARMM) ang saysentay tres (63) ka mga barangay sa North Cotabato, sugod karong adlawa Mierkules, Nobiembre 20.
Sumala sa BARMM spokesman ug Minister of Local Government nga si Naguib Sinarimbo, ang opisyal nga pagtunol sa mga barangay ilawon sa BARMM pagahimoun pinaagi sa usa ka regular nga session sa Bangsamoro Parliament.
Gibutyag ni Sinarimbo, nga ang Sangguniang Panlalawigan sa North Cotabato mipasar na ug resolusyon kabalin sa paghatag sa 63 ka barangay paingon sa BARMM, nga may gihimong basehan arn himoun ang pagtunol sa mga barangay karong Mierkules.
Ang opisyal turn-over tambungan ni Acting North Cotabato Governor Emmylou Mendoza ug mga miembro sa provincial board.
Matud sa mga taho, nagdesisyon si Mendoza sa turn-over maskin wala pa kini mikonsulta sa mga opisyales sa BARMM.
Ang mga masakop sa BARMM gikan sa North Cotabato mao ang mga barangay nga sakop sa munisipyo; Aleosan, Carmen, Kabacan, Midsayap, Pigkawayan ug Pikit.
Ang maong mga barangay tagaan ug admnistrador aron mahimong hapsay ang iyang pagbalhin.
Ang pagbalhin sa mga barangay ubos sa panggamhanan sa BARMM gibasi sa plebisito nga gihimo niadtong milabayng Enero 21 ug Pebrero 6, 2019. Ang mga barangay nga mibuto pabor sa BARMM, maoy nalakit sa mg ai-turn-over.-Jiann Padillo