Kolektor sa lending patay sa aksidente

Posted on

MAKILALA, North Cotabato — Patay ang kolektor sa Big8 Lending sa usa ka aksidente didto sa Malaang human kini misampok sa usa ka motor ug milahos sa truck, alas 6:00 sa gabii niadtong Sabado, Pebrero 1.

Nailhan ang biktima nga si Librado Abaniel Hisula, 21 anyos, residente sa Barangay Singkatulan, Makilala ug nanarbaho isip kolekto sa Big8 Lending.

Sumala ni PNP Chief Police Major Arniel Melocotones, ang hepe sa Makilala police, gimaneho ni Hisula ang iyang motor gikan sa Kidapawan City ug paingon kini sa Makilala sa dihang mi-overtake kini sa usa ka Isuzu truck, apan didto kini paingon sa iyang kasugat nga motor nga gimaneho sa usa ka Baluno Wahab Pagagao, 26 anyos ug residente sa barangay Patadon, Matalam.

Nabangga si Hisula sa motor ni Pagagao, apan tungod sa kakusog sa impak, subli kining nalagpot sa atubangan sa usa pa ka truck nga gimaneho ni Joey Cabrido, residente sa New Pangasinan, Koronadal, South Cotabato.

Gidala gilayon si Hisula sa hospital, apan gideklara kining dead upon arrival. Samtang nagpabilin sa balay tambalanan si Pagagao.

Ang kurbada sa Malaang anaa sa tunga sa barangay Saging ug Makilala Poblacion, siko kaayo ang kurbada ug ngitngit kini atol sa kagabhion. Daghan nang aksidente ang natala sa maong lugar, ug sagad miresulta sa kamatayon.

Adunay karatula nga gibutang una pa moadbot sa maong kurbada nga nagpahibalo sa mga lumalabay nga mag-amping.

Usa sa mga tag-iya sa Big8 Lending, mao ang kasamtangang Mayor sa Makilala nga si Armando Quibod.-Angel Grace Celebrado/NewsLine.ph

Be informed
  • 33
  •  
  •  
  •  
  •  
    33
    Shares
  • 33
  •  
  •  
  •