DAKBAYAN SA ILIGAN — GI-Aresto na usab sa kapulisan ang usa ka senior citizen nga bag-ong laya sa prisohan, human iyang gitigbas patay ang iyang igsoon.
Giila ni Police Lieutenant Baltazar Deguilmo, Hepe sa Maigo Municipal Police Station, ang suspetsado nga si Nolly Dela Peña, 60 anyos.
Gidakop si Dela Peña ganinang buntag human niya gitigbas-patay, ang iyang igsoon sulod sa ilang balay sa Barangay Labuay, Maigo, Lanao del Norte.
Sa taho sa kapulisan gitigbas ni Dela Peña ang iyang igsoon nga si Evilen Dolier, 46-anyos, human sila naglalis tungod sa pagkaon nga niluto samtang sila namahaw.
Saysay ni Deguilmo, samtang naglalis ang magsoon, mikuha ang suspek og sanggot ug kutsilyo ug gitusak-tusak ang biktima sa li-og, atubangan sa ilang 80-anyos nga inahan.
Nasuta usab sa kapulisan nga pirmi mag-away ang magsoon kay walay trabaho ang suspetsado.
Nakita usab sa rekord sa kapulisan nga niadtong Disyembre 2019 lang nakagawas sa prisohan ang suspetsado, human niini gi-serbisyuhan ang iyang sentensya human niini giduggab patay ang iyang silingan,-Divina M. Suson