DAKBAYAN SA DABAW — DILI mapungan sa actress nga si Kim Chiu ang iyang luha samtang ilang gisaysay ang iyang kahadluk sa dihang gipamusil sa wala pa mailhing armado ang van nga iyang gisakyan, didto sa Quezon City kaganinang buntag.
Sa interbyu sa aktress human ang insidente, gibutyag niini ang iyang kalisang, natulog kuno siya sa sulod sa sakyanan ug nakamata na lang sa dihang iyang nadungog ang mga buto buto.
Kuyog sa aktres ang iyang assistant ug iyang drayber paingon sa taping sa iyang show, sa dihang gipaarakan ang iyang van.
Mapasalamaton ang aktres kay luwas silang tanan bisan pa man sa walo ka bala nga miigo sa ilang sakyanan.
Matud sa aktress maayo na lang kay natulog kini sa dihang nahitabo ang pagpamusil kay kung wala posibleng maigo kuno siya.
“Nagabasa ko sa script kay paingon ko sa taping, unya nakatulog ko, nakahigda sa sulod sa sakyanan, nakamata ko sa saba sa buto,” saysay sa bisaya nga aktres.
“Kung gamata ko, posible maigo ko kay mobangon ko, kay magpadayon ko ug basa sa script” dugang sa dalaga.
Wala gayod nahibalo ang aktres kung unsay iyang sala, wala man usab kuno siya’y kalaban nga mahinumduman.
Nagpasalamat ang aktres sa mga tawonng nagpadala ug mensahe ug Pag-ampo alang kaniya.
Sumala sa taho sa kapulisan, duha ka wala pa mailhing armadong lalaki ang namusil sa aktres, og karon gipangita na aron mailhan kini.-wat/NewsLine