DAKBAYAN SA DABAW — GIRONDA kagahapon sa hapon sa mga sakop sa Food and Drug Administration Region XI ug sakop sa National Bureau of Investigation (NBI- SEMRO XI) ang usa ka factory nga nagahimo og alcohol ug uban pang disinfectant kay walay napakitang permit.
Walay gikapakitang permit ang nahisgutang factory nga nagsige og gama og alcohol disinfectant, hand sanitizers ug mga sabon didto sa Juna Subdivision ning dakbayan.
Giila sa NBI ang mga dinakpan nga sila si Socrates Cadayona Jr. y Iturralde ug si Monique Ayville Layno Tautho.
Nasayran usab sa otoridad nga sa online ginabaligya ang ilang produkto ug mahal kini kumpara sa gitakdang presyo sa Department of Trade and Industry (DTI).
Ang mga suspetsado pasakahan sa NBI ug kaso sa paglapas sa mga balaud sa FDA sama sa paggama ug mga produkto nga wala moagi sa maong buhatan-Reeya Nuñez