DAKBAYAN SA DABAW — Mokabat sa 22 ka mga lugar sa katorse ka barangay ning dakbayan ang gipa-lockdown ni Mayor Sara Duterte tungod sa mga bag-ong kaso sa coronavirus disease.
Matud ni mayor Sara Duterte-Carpio sa iyang interbyu sa DCDR, ang gipang-lockdown naglakip sa 17 ka panimalay, upat ka compound, ug usa ka karsada sa dakbayan.
Gipaubos sa lockdown ang maong mga lugar human nagpositibo ang pipila ka mga residente sa gihimong random testing.
Nagdumili hinuon Duterte-Carpio sa pagbutyag sa eksaktong mga lugar kung asa gi-implementar ang lockdown.
“Dili na kinahanglan ipahibalo sa publiko ang specific area sa atoang mga lockdown,” ingon sa mayor.
Hinuon, gibutyag ni Duterte nga ang gipang-lockdown nga mga lugar nahimutang sa Barangay Sto. Niño, Tacunan, Daliao, Ilang, Barangay 21, Barangay 23, Leon Garcia, Bago Gallera, Catalunan Grande, Baliok, Talomo, Angliongto, Buhangin Proper, ug Cabantian.
“Amo ning gitawag og house lockdowns, street lockdowns, ug dunay mga compound nga gina-lockdown. Meaning, medyo dako ang household nga adunay positive ug mga surrounding households nya,” pasabot ni Mayor Sara.
“Ang lockdown nato is implemented by the Security Group and recommended by the Health Group headed by the City Health Office,” dugang sa mayor. (LBG)