DAKBAYAN SA DABAW — MODUNGGO na sa pantalan ning dakbayan ang barko sa Philippine Navy nga “BRP Bacolod City” (LS-550) karong Biyernes, Mayo 8, dala ang mga personal protective equipment (PPE) nga gikan sa China.
Matud pa sa hepe sa Navy Public Affairs Office nga si Lt. Commander Ma. Christina Roxas nga karong Lunes, Mayo 4, ang BRP Bacolod City kasamtangang naa na sa kadagatan dapit sa Oriental Mindoro ug gibanabana kining moabot sa Davao sa Mayo 8.
“The ship is now in Oriental Mindoro waters. ETA (estimated time of arrival) of LS-550 (in Davao) is on May 8,” si Roxas nag-ingon.
Ang barko migikan sa Zhangzhou Harbor sa Xiamen, China niadtong Huwebes, Abril 30, nga karga ang 700,000 ka mga KN95 face mask ug 200,000 ka mga PPE, nga naglakip sa mga googles, coverall suits, head cover, gloves, shoe covers, surgical masks, ug surgical gowns.
Kini nga mga PPE ipanghatag sa mga frontliner sa Department of Health sa Davao, Cebu, ug Manila.
Sumala pa ni Roxas, ang mga tripolante ug miyembro sa BRP Bacolod City migikan sa China nga wala magpakita og mga sintomas sa coronavirus disease (Covid-19).
“BRP Bacolod City left China with no members exhibiting any symptoms of (the coronavirus disease 2019) Covid-19 as a result of its stringent measures on the safety and health of its personnel on board,” Roxas said.
fInig kahuman og diskarga sa mga PPE sa Davao, ang BRP Bacolod City molarga dayon paingon sa Cebu ug dayon sa Manila. (LBG)