BONIFACIO, MISAMIS OCCIDENTAL— Nabawi sa mga sakop sa kapulisan niining lungsod ang nagkadaiyang smuggled nga mga sigarilyo didto sa Border Control Point sa probinsya.
Gipahayag ni Police Colonel Danildo Tumanda, PNP Provincial director sa Misamis Occidental nga usa ka cargo truck nga adunay daghang kinarton nga sigarilyo ang miagi sa maong control point ug sa dihang gipangitaan sa hustong mga dokumento wala kini gikapakita.
Gani ang mga suspek nagpaila pa nga mga sakop sa Inter-Agency Taskforce (IATF) ug sa dihang gisuhid ang mga kargamento nasuta nga nagkadaiyang klase sa sigarilyo ang sulod sa 181 ka karton.
Namatikdan nga walay tikita kon tax stamps ang mga karton nga nagpasabot nga wala kini makabayad og excise tax. Gawas pa niana walay mga graphic warning ang mga sigarilyo nga nakompiska.
Gibanabana nga moabot sa P4.1 M nga excise tax ang nahanaw sa gobiyerno.
Ang mga suspek giila sa PNP nga sila si Richard Susi, us aka driver sa Local Government Unit sa Dumalinao, Zamboanga Del Sur; Noel Cabonila, 42 ug Brgy. Coordinator Social Services Facilitator Office; Yandre I. Gonzales, 40 laborer, ug John Mark O. Trocio, 30, laborer ug pulos mga nagpuyo sa Pagadian City.
Ang nabawi nga mga items gikatakda nga i-turn-over sa Bureau of Customs. –Neptalie Batolenio