Senior citizen patay atol sa pagkasunog sa ilang balay

Posted on

DAKBAYAN SA OZAMIZ — PATAY ang usa ka senior citizen human nga wala makagawas sa dihang nasunog ang balay niini sa Purok 2, Barangay Labo, ning dakbayan, sa may alas 10:30 sa buntag niadtong Hunyo 12, 2020.

Giila ni Fire Officer 1 Abraham Abay, chief investigator sa Ozamiz City Bureau of Fire Protection (BFP) nga ang biktima usa ka Erlinda Reroma Lagarbe, 68 anyos.

Sa inisyal nga imbestigasyon sa BFP-Ozamiz nahibaw-an nga nagsugod pagdilaab ang kalayo gikan sa kusina sa biktima ug posibleng nalimtan sa biktima ang giluto niini nga maoy hinungdan sa sunog.

Nasayran nga ang biktima halos dili na makakita ug hinay nga molakaw tungod sa sakit nga diabetes nga maoy gituohang hinungdan nga wala kini makagawas samtang nahitabo ang sunog.

Sa nakuhang kasayuran nga adunay mga kauban ang maong biktima sa panimalay, apan wala diha sa nahitabo ang sunog tungod kay aduna kini gilakaw.

Gidugang sa pagsugilon ni Abay nga alas 10:55 na sila nakadawat sa tawag nga adunay nahitabo nga sunog ug sa pagdangat sa mga bombero sa maong dapit naugdaw na ang panimalay.

Lakip sa naugdaw ang  tapad nga balay nga  ginama sa light materials og gipanag-iyahan sa usa ka Gemma Lasula.

Samtang ang biktima nakita na lamang sa mga bombero nga maayong pagkapaig.

Gideklara sa BFP nga fire out mga alas 11:28 sa buntag.

Gibanabana sa BFP nga moabot sa P400,000 ang structural damage sa sunog sa duha ka balay.

Sa pagkakaron padayon pa gihapon ang imbestigasyon sa BFP-Ozamiz sa maong sunog.-Neptalie A. Batolenio

Be informed
  • 16
  •  
  •  
  •  
  •  
    16
    Shares
  • 16
  •  
  •  
  •