DAKBAYAN SA DABAW –— Dili kuno angay nga ikasuko sa mga Cebuano kon ingnan sila og ulo kay tinoud kini, matud pa ni Presidente Rodrigo Duterte sa iyang pamulong niadtong Martes sa gabii.
Sa iyang pakigpulong sa katawhang Filipino pinaagi sa telebisyon, gilakbit sa Presidente “Kamong mga Cebuano, masuko mo’g muingon ko’g gahi mo’g ulo. Actually, ayaw mo’g kainsulto kay Cebuano ko.”
Kini iyang giluatan sa dihang iyang gipasabot nganong taas gihapon ug kaso sa coronavirus-19 sa dakbayan sa Cebu, maong iyang ipailawom sa Enhanced Community Quarantine (ECQ).
“I am a Cebuano. I come from Danao, Cebu. Kay ang mga Bisaya talaga, maski sa Davao, ‘yung mga Bisaya doon ang titigas talaga ng ulo hindi mo mapasunod, Iyan ang totoo, iyan talaga prangkahan ko kayo. Magalit kayo. Masuko mo nako, eh di masuko pud ko ninyo,” dugang ni Duterte.
Sa tibouk nasud, ang lungsod sa Cebu lang ang nagpabiling anaa sa ECQ, tungod kay taas pa ang kaso sa Covid-19 sa maong dakbayan.
Matud niini, dili man iyang pagbout kon unsa ang quarantine status sa mga lugar, apan, pagbout kini sa Inter-Agency Task Force on Emerging Infectious Disease (IATF-EID).
Bisan pa man kon unsa ang quarantine status sa matag lugar, gi-awhag gihapon sa Department of Health ang pagsout sa face mask, pag-subay sa physical distancing, pirming paghugas sa kamot ug uban pang giya aron malikayan ang inpeksyon sa coronavirus tungod hangtud karon wala pay tambal pangkontra sa maong virus.-ezc/Newsline