LUNGSOD SA DABAW-— Mikunhod ang ihap sa mga estudyante nga nagpa-enroll alang sa tuig 2020-2021 sa syudad sa Kidapawan.
Tungod niini, nanawagan ang Department of Education sa Kidapawan City Division sa mga ginikanan nga ipa-enrol na ang ilang mga anak tungod kay nagpadayon pa gihapon ug lista ang mga tulunghaan.
Dili lang sa Kidapawan ningkunhod ang nagpa-enroll, kini usab naobserbahan sa nagkalain-laing syudad sa nasud. Hinungdan nga nagdesisyon ang DepEd nga i-extend ang enrollment hangtud sa Hulyo 15, 2020.
Sa taho sa dxND Radyo Bida, gi-admitar ni Omar Obas, ang City Schools Division Superintendent nga mikunhod ang mga nagpa-enroll sa mga pribadong tulunghaan.
Sa nahisgutang taho, gisaysay niini nga 35porsyento palang ang nagpa-enroll kumpara sa nag-enroll niadtong 2019-2020.
Sa mga pangpublikong tulunghaan, anaa lang sa 80 hangtud sa 85 porsyento ang nag-enroll.
Sa Kidapawan division, ilang gamiton ang Blended learning, kini nagpasabot ngadunay modular ug sa radyo ipaagi ang mga leksyon, ug mga instruksyon pinaagi sa tabang sa With Love Jan Foundation ug DXND- NDBC Kidapawan, aron mapaabot sa mga estudyante ang ilang mga pagtulun-an.
Ubos sa maong pamaagi, gilauman sa DepEd nga motabang ang ginikanan sa pagpasabot sa ilang mga anak kabahin sa ilang leksyon.
Apan, paborable lang ang maong pamaagi kung nakahuman ug high school o nakatamak sa koliheyo ang ilang mga ginikanan.
Dili usab klaro kung puede ba ibalik-balik sa mga bata pagmaminaw ang ilang leksyon sa kahanginan.
Si Kristine Bayon, grade-11 na unta, apan, wala siya nag-enroll kay mahadluk kini nga dilli kaapas sa leksyon sa eskuelahan kay walay maestra sa iyang atubangan.
Matud ni Kristine, iyang mama dili usab makatabang kaniya tungod kay Grade 5 ra ang nahuman niini, maong nagdesisyon ang pamilya nga dili usa nila ipa-enroll ang ilang duha ka anak.
Dakong hagit sa mga magtutudlo, ginikanan ug sa mga estudyante ang bag-ong pamaagi sa pag-eskuela kay wala na ang ilang maestra sa ilang atubangan.
Ang bag-ong pamaagi sa pag-eskuela maoy nahimong alternatibo sa DepEd tungod sa pandemya sa covid-19 kong diin dili usa paadtuon sa mga eskuelahan ang mga bata sa kahadluk nga matakbuyan sila sa coronavirus.-Newsline