Kanhi Information Officer sa DavNor gi-aresto

Posted on

DAKBAYAN SA DABAW –— Kanhi information officer sa probinsya sa Davao del Norte gi-aresto niadtong Bienes Huly 24, sa mga sakop sa Criminal Investigation and Detection Group (CIDG) human gikasuhan ni Governor Edwin Jubahib og ‘oral defamation’.

Gidakop ang magsisibya nga si Paterno Lucero Paquiao kon Pat Lucero, didto mismo sa iyang istasyon sa radyo 99.9 RP FM sa Dakbayan sa Tagum , subay sa warrant of arrest nga gipagawas sa Municipal Trial Court in Cities (MTCC) nga dunay Criminal Case No. 32106-20, Myerkoles, Hulyo 21

Si Pacquiao gitudlo ni Jubahib isip provincial information officer sukad Hunyo hangtud Oktobre 2019.

Daling mibayad ug piansa si Paquiao alang sa iyang temporaryong kagawasan samtang taralon sa korte ang iyang kaso.

Sumala sa Resolusyon nga gipagawas sa Office of the City Prosecutor, Tagum City, mipasaka ug reklamo si Jubahib tungod sa pagsige ug makmak kaniya ni Pacquiao, partikular niadtong gabii sa Nobyembre 12, 2019.

Sa usa ka Facebook Live video, gipasanginlan kuno sa magsisibya ang Gobernador nga misulay ug patay kaniya (attempted murder) ug paghatag og suborno (bribery).

Gigawas sa video nga militok si Paquiao “Gov ngano man ko imong ipapatay? Nganong dili man ko nimo istoryahon? ug Good…? Good ba nang magsige’g panghatag ug kwarta sa mga tao para mahumot?.”

Ang akusasyon ni Paquiao batok sa gobernador nga migawas sa Facebook Live gipamatud-an pinaagi sa mga Affidavits nga gilagdaan nila ni George B. Pangandoyon, Emmanuel D. Jorgio ug Barsabas Largo, og kini ilang gisumitir sa City Prosecutor’s Office.

Sa pakihighinabi ni Paquiao sa mga reporter atol sa pagsikop kaniya, gigamayan ra kuno kini sa kaso nga iyang gi-atubang, gani matud niya “Kini nga warrant mao ni ang pinaka-baba nga kaso nga akong giatubang kay oral defamation ra man, kay kasagaran ma-warrant ta, libel ana man gyod.”

Sa iyang hulagway sulod sa buhatan sa CIDG, makita si Paquiao nga nagkatawa samtang nag atubang sa mga otoridad.

Nagpasalamat pa gani ang magsisibya sa gobernador kay ‘oral defamation’ lang ang gipasaka batok kaniya “Kini, ako lang pod gipasalamatan kay oral defamation ra, mora’g pang-barangay ra man ni nga kaso. Ingon sa warrant maka-piyansa man pod ko, gamay ra man pod ang piyansa ani, so okay na. Niari ko dire para mahikay nako ni, ma-piyansahan. “

Matod ni Pacquiao wala sya nagtuo nga nasuko si Jubahib, gani, duda ni Paquiao gi-intriga ra kuno ang governador maong gipasakahan siya ug kaso.

Bisan pa man sa kaso nga gipasaka kaniya, nagpasalamat si Pacquiao kay nakapagawas ang governador sa iyang kasulo, sumila niya, mas maayo kuno kay gipasakahan siya ug kaso, kay mas delikado “Kung naay kasuko ang tawo nga (di) ipaagi’g proseso delikado man ta ana. So, kini okay ni nga makatubag ta, unya mag-abot mi kung magka-estorya. “

Ang Resolusyon nga gipetsahan Pebrero 21, 2020 “nalangan” tungod sa COVID-19 pandemic.-Winkle Mae M. Tabuclao/Newsline

Be informed
  •  
  •  
  •  
  •  
  •  
  •  
  •  
  •  
  •