DAKBAYAN SA DABAW — Sugod karong Lunes, Agosto 3, walaon na ang pagamit sa food and medicine (FM) pass ug ang pagpatuman sa curfew hours dinhi sa dakbayan bisan pa man nagpabilin kini ubos sa Modified General Community Quarantine (MGCQ).
Kini ang gi-anunsyo ni Mayor Sara Duterte-Carpio niadtong Biernes sa Davao City Disaster Radio, human gibutyag sa National Inter-Agency Task Force (IATF) ang quarantine status ning dakbayan.
Matud sa mayor, sa pagwagtang sa FM pass ug curfew, iyang gilauman nga madisiplina sa matag-usa ang ilang kaugalingon aron malikay sa impeksyon sa makatakod nga coronavirus-19.
Bisan pa man sa pagwagtang sa maong regulasyon, gimandu sa mayor nga itago lang ang mga FM pass kay basin ug gamiton gihapon kini pag-abot sa panahon.
Gi-awhag sa mayor ang katawhan nga magbinantayon ug himuong kabahin sa ilang tulumanon ang pirming paghugas sa kamot, pagsout ug face mask ug pagsunod sa dos-metros nga distansya labi na sa pampublikong lugar ug ang pagpondo sa mga panimalay.
Disiplina sa kaugalingon, kini ang bout ipasabot sa mayor, kay matud niini, ang kadaugan sa away kontra covid-19 naga depende sa kooperasyon sa matag-usa, samtang wala pay bakuna alang sa maong kagaw.
“Gusto nato nga mamahimong responsable ang katawhan, kahibalo sila nga dunay quarantine, dunay stay at home, pero wala na tay regulation to make sure that they stay at home. We want people to understand nga kinahanglan mag gikan na sa ilaha,” pasabot ni Duterte-Carpio.
Gipahinumdoman sa mayor ang maga Dabawenyo nga mogawas lang sa ilang balay kung importante gayud ang ilang tuyo, sama sa pagtrabaho, pagpalit ug pagkaon, kaay bisan pa man wala nay FM pass ug curfew, anaa pay quarantine nga gipatuman.
Magpagawas sa syudad og bag-ong giya sa pag implementar sa MGCQ.-Winkle Mae. M. Tabuclao/Newsline.ph