DAKBAYAN SA DABAW— Ang pagwarning ni Presidente Rodrigo Duterte sa mga dagkong patigayon sama sa mga kompanya sa telecommunications nakapalisang kuno sa mga kapitalista.
Sumala ni Martial Beck, kanhi executive vice president sa European Chamber of Commerce, lisod mokumbinse sa mga langyawng kapitalista nga dinhi sa Pilipinas aron mobubo og kapital tungod sa mga gipamulong ni Duterte.
Niadtong milabay’ng simana, gihulga ni Duterte ang Globe ug ang SMART telecommunications nga iya kining ipasara kung dili nila maatiman ang reklamo sa katawhan sa hinay nila nga serbisyo.
Matud ni Duterte walay rason nga dili mahatag ang serbisyo nga gibayran sa kawtahan tungod kaay ila kining gisaad sa ilang kleyente. Tungod niini, mibahad ang Presidente nga iyang ipasira ang nahisgutang kompanya kung dili nila matarong ang ilang serbisyo hangtud sa Disyembre ning kasamtangang tuig.
Sa interbyu sa CNN Philippines kang Beck, gibutyag niini nga naglisod na gani ug pasulod ug mga langyawng negosyante ang Piilipinas, ug nadugangan pa kini sa bag-o pa lang giluatan ni Duterte nga iyang gukuron ang Globe ug Smart telecommunications kung dili nila ayuhon ang ilang mga serbisyo.
“Ang mga pulong nga iyang gibuhian dili pa lang dugay makapahadluk sa mga negosyante,” matud ni Beck.
Bisan pa man niini, nagtuo si Beck nga sakto ang gihimo sa gobierno nga iduso ang pagpasar sa ‘Corporate Recovery and Tax Incentives for Enterprises (CREATE) Act’.
Ang CREATE Act or formerly Corporate Income Tax and Incentives Rationalization Act (CITIRA), naglatid og mga probisyon nga mogamay ang bayranan sa corporate income tax rate gikan 30 porsyento hangtud 25 porsyento.
Ang paghatag ug ligway sa bayaran sa buhis, matud ni Beck, dakung tabang sa mga negosyante labi na panahon sa pandemya, kung diin daghan ang mga patigayon nga nanira ug dakung kita ang nawala kanila.
Ang paghatag og nga insentibo sa bayaran sa buhis dakung tabang sa mga kapitalista, ug ang pagpasar sa CITIRA, makatabang gayud sa mga negosyante.
Matud ni Beck, gusto lang sa mga negosyante nga maniguro nga safe ang ilang mga patigayon ug walay balaud o desisyon nga makabalda niini, labi na kay pait ang sitwasyon sa milabayng lima ka bulan.-Winkle Mae M. Tabuclao/Newsline.ph