DAKBAYAN SA DABAW – Pormal nang giabrihan sa publiko niadtong Martes, Agosto 25, ang bag-ong coronavirus-19 (Covid-19) isolation facility sa Barangay Gata, Jimenez, Misamis Occidental.
Ang non-aircon facility ug adunay 35 ka mga higdaanan, humok nga kama, unlan ug habol aduna sab personal hygiene kit, lingkuranan, lamesa, ug kasilyas.
Gitambungan ni Misamis Occidental Governor Philip Tan ang pag-abri ni Mayor Rosario Balais sa 35 bedroom nga Isolation Facility.
Sa iyang mensahe atol programa, gipalanog ni Tan nga ang LGU Jimenez, maoy labing unang nakadapit kaniya nga mahimong bisita sa ipahigayon nga blessing sa usa ka COVD19 isolation facility.
Nindot ang pasilidad kay kompleto ang matag lawak niini sa gikinahanglan alang sa usa ka returning resident aro mamahimong komportable ang ilang temporaryong pagpuyo samtang naka-quarantine.
Si Mayor Rosario Balais mipasabot, nga ang maong Isolation facility mibalor og 4.3 million pesos diin 3.9 million pesos niini ang gihatag gikan kang Presidente Rodrigo Roa Duterte isip ayuda tugbang sa usa ka bulan nga IRA samtang nag supplemental budget ang lungsod sa kantidad nga 590 thousand pesos.
“ If ever mahuman na ta aning COVID19, kini nga facility mao na ang atong permanent evacuation site if ever naay emergency, so magamit gihapon ni nga facility” dugang pamahayag ni Mayor Balais.
Nasayran nga kini na lamang ang isolation facility nga nahibilin sa lungsod sanglit ang una nilang 15 bed capacity isolation facility mao man ang eskwelahan sa barangay Gata apan giuli na nila kini sa DepEd aron maandam na sa pag bukas sa klase karong Oktobre.
Mitambong usab sa blessing ug inagurasyon sila si Vice Governor Aurora Virginia Almonte, Board Member Thata Paylaga-Lim, chairperson sa Committee on Health sa Sangguniang Panlalawigan, Board Member Agnes Villanueva, Ruvy Ala and Winston Catane. Present usab sila si Jimenez Vice Mayor Jojo Chiong, mga sakop sa Sangguniang Bayan ug mga Department Heads.-Expedita G. Roxas