Sigbin nangataki og baboy sa Ozamiz

Posted on

DAKBAYAN SA OZAMIZ — Nakurat  ang mga lumolupyo sa Purok 1, Barangay Dimaluna ning lungsod sa dihang giataki sa gituohan nilang sigbin ang ilang binuhing baboy nga misangpot sa pagkamatay  sa usa niini .

Gipahayag ni Sheryl Calapine, nga nakadugong siya ug kasikas bandang 11:45 ang takna sa gabii niadtong Lunes, September 7, 2020, ug iyang nakit-an ang hayop   kolor brown, siga og mga mata ug gi-ataki ang iyang binuhing baboy.

Saysay niini nga nakadungog sila og iyagak sa baboy hinungdan nga gisuhid sa iyang bana sa pagtuo nga nalambod lang kini apan nakita sa iyang bana nga naigo sa siga sa flash light ang siga nga mata sa maong mananap nga gituohan nila nga sigbin.

Dugang ni Sheryl nga dali usab nga miikyas padulong sa ngitngit nga bahin ang maong mananap.

Sa dihang ilang gisusi ang naputos sa samad pinaakan ug kinawrasan ang ilang binuhing baboy ug wala nay kinabuhi.

 “Namatay jud among baboy wala na lang namo ihawa kay nahadlok man mi, dili pa ra ba to amo kay inalimahan ra to. “ dugang pamahayag ni Sheryl.

Sa laing bahin, gipadayag ni Reynard Lapi, lumupyo sa maong Purok nga ang ila usab nga binuhing baboy ang makaduha nga giatake sa maong mananap.

Saysay niini nga gabii usab nga giatake ang ilang binuhing baboy. Naakaangkon usab og mga samad ang maong baboy hinuon wala kini namatay. Sa pagkakaron ang ilang binuhing baboy maglisod na kini sa paglakaw tungod sa mga pinaakan sa maong mga mananap nga gituohan nga sigbin.

Una niini, gipadayag ni Editha Calapine, ugangan ni Sheryl nga niadtong Dominggo sa udto, (September 6) aduna siyay nasiplatan nga mananap nga miagi sa ilang nataran ug sa iyang tan-aw usa ka iro apan dili sama sa iro nga kanunay niyang makita tungod kay dako man kini.

Iyang gidugang nga kadto pa siya makakita sa maong matang sa iro nga wala man lang gani kini mopaghot ug ang ubang iro nga naagian niini daw saw ala man lang makakita.

Nasayran nga duha ka tuig na ang milabay, may mga lumolupyo usab sa Purok 6 sa barangay Dimaluna ang  nabiktima na  usab sa maong mananap human giataki  ang  mga binuhing manok ug pato.

Apan hangtud karon dili pa nila makompirma kon ang maong mananap usa ka iro,  kay daghan usab ang mga nag  ingon nga pamasin kon nagpa iro iro lang apan kini usa ka matang sa sigbin  o kahibulongang  mananap nga moataki sa mga binuhi,.

Wala pay gipagawas nga pahayag ang mga opisyal sa barangay may labot sa giingong pag-atake sa gituohang sigbin.-Neptalie Batolenio/Newsline.ph

Be informed
  • 16
  •  
  •  
  •  
  •  
    16
    Shares
  • 16
  •  
  •  
  •