DAKBAYAN SA DABAW-— Gibasura sa Supreme Court ang petisyon alang sa gipangayong pagpahigayon ug Covid-19 mass testing human nakitaang way igong rason nga kinahanglan kining himuon.
Pinaagi sa usa ka resolution nga gipagawas sa Korte Suprema niadtong Sept. 1 gitubag niini ang hangyo sa pagpangayo og writ of mandamus o order gikan sa korte nga magmando sa Department of Health ug ubang mga ahensya nga gitahasan batok Covid-19 pandemic nga mohimo o magpahigayon og mass testing, contract tracing ug effective treatment sa mga positive cases.
Gibutohan sa mga opisyal sa Korte Suprema ang petisyon ug botong 13-1-1, ug sa wala pag-apil ni Associate Justice Marvic Leonen, ug ni Associate Justice Priscilla Baltazar-Padilla nga naka-leave, nabasura kini.
Kanihumduman nga niadtong Hulyo 3, 2020, onse (11) ka indibidual nga gipangunahan ni kanhi social welfare Secretary Judy Taguiwalo, ug gi-representahan sa National Union of Peoples’ Lawyers (NUPL), ang mipasaka og petisyon sa Korte Suprema nga imando sa panggamhanan ang mass testing, aron kuno daling mahibaw-an kon kinsa na ang natakbuyan sa Covid-19.
Ilang gihangyo ang Korte Suprema nga manduan ang gobierno nga himoun ang mass testing basin sa natakda sa batakang balaud nga angayang proteksyonan sa estado ang iyang katawhan labi na sa panahon sa pandemya tungod kay matud pa, wala gihimo sa administrasyong Duterte ang iyang obligasyon sa katawhan.
Buot sab nila nga muhatag og kumpletong detalye ang gobyerno sa Covid-19 nga sitwasyon, insaktong inpormasyon ug kumpletong detalye sa matag kaso.
Apan, ang maong petisyon deritsong gibasura sa korte bisan og wala pa makahatag ug komentaryo ang gobyerno.
Gipasabot sa Supreme Court nga wala silay katungod nga mo-isyu og writ kon pagtugot bisan pa og emerhensiya gawas na lamang og dunay opisyal sa Palasyo ang wala mihimo sa iyang trabaho ug obligasyon.
Ang trabaho sa korte ang pagsulti unsa ang balaod ug dili ang pag-dikta sa usa ka government agency og usaon paghimo sa ilang trabaho.-Cheche G. Diabordo