OZAMIZ CITY--Aron maseguro nga kanunay nga luwas sa Coronavirus disease (COVID-19) ang mga employedo sa Ozamiz City hall, gimando ni Mayor Sancho Fernando ‘Ando’ Oaminal nga ipailalom sa Swab kon Antigen Testing ang tanang mga empleyado niini ugmang adlawa.
Tungod niini, suspendido ang tanang transaksiyon sa City Hall ugmang adlawa, Nobiyembre 3, gikan alas 8 sa buntag ngadto sa alas 12 sa udto.
Gidugang niin nga mobalik lang ang pag-atiman sa mga transaksiyon 1:30 sa hapon.
Kahinumduman nga una na nga gipadayag ni Oaminal nga ang LGU Ozamiz nakapalit og swab antigen test kits alang sa Ozamiz City.
Ang maong test maoy pinaagi sa pagkuha og mga specimen gikan sa ilong ug ang resulta mahibaloan gilayon human sa 30 minutos.
Saysay ni Oaminal nga ang mga test kits dako og ikatabang sa team sa Ozamiz aron dali nga masayran kinsa ang nagpositibo sa COVID-19.
Gidugang ni Oaminal nga ang accuracy result niini maoy 100 percent, tungod kay walay false negative ug base usab sa Inter Agency Task Force-Department of Health (IATF-DOH) updated omnibus guidelines nga ang mga pasyente nga magpositibo gamit ang rapid antigen testing gikonsidera nga positibo sa COVID-19 ug dili na kinahanglan ang confirmatory testing pinaagi sa RT-PCR.
Atol usab sa gipahigayon nga 8th State of the District Address (SODA) ni MIsamis Occidental 2nd District Representative ug Deputy Speaker Henry Oaminal niadtong Oktubre 30, 2020, ang tanan nga mitambong niini ang gipailalom usab sa SWAB Antigen Testing.
Sa mokapin sa 200 ka mga mitambong mga nagpa-swab test sa venue sa SODA usa niini ang nagpositibo.-Neptalie A. Batolenio/ Newsline.ph