DAKBAYAN SA DABAW — Otsenta y otso (88%) nga nagmalampuson ang ginahimong video conference sa pagtaral sa mga kaso sa nagkalain-laing klorte sa tibouk nasud, matud ni Supreme Court administrator Jose Midas Marquez.
Una nang gimando sa Korte Supreme nga ipahigayon ang mga hearing sa korte pinaagi sa video conference aron malikay ang mga kleyente niini sa Coronavirus.
Nahimong epektibo ang pagdungog sa mga kaso, saysay ni Marquez, napamatud-an nga usa ka epektibo nga gamit sa new normal.
Atol sa Laging Handa Briefing, gisaysay ni Marquez nga sukad Mayo 4 hangtod Oktubre 16, nakapahigayong ang mga korte ug 110,369 ka nga video conferences, ug 88 porsyento kining nagmalampuson samtang ang nahabilin nga 12 porsyento naapektuhan sa problema sa internet koneksyon.
Sukad Marso 17 hangtud Oktubre 16, adunay 81,888 ka mga Persons Deprived of Liberty kon PDL ang napagawas sa prisohan bisan pa man nga adunay hulga sa coronavirus 2019 (Covid-19) pandemic. Sa maong gidaghanon, 46,032 PDL ang gipagawas pinaagi sa mga video conference hearings.
“Nagresulta usab kini sa pagpagawas sa 880 ka mga menor de edad o ang gitawag nato nga children in conflict with the law (CICL). Ang mga pagdungog nga napahigayon sa lainlaing yugto, adunay mga piyansa nga madungog, maabsuwelto, ug paghangyo og pagsulay.”
Ang pagtaral sa kaso pinaagi sa video conference sa mga korte, usa ka lakang nga gihimo aron mapaniguro nga hapsay ug magpadayon ang kalihukan sa mga korte ug mahatagan og hustisya ang katawhan taliwala sa pandemya.
“Ang tanan natong korte abri taliwala sa pandemya. Adunay pila nga gipasarado sa piskal tungod sa mga kaso sa Covid-19 sa mga empleyado, apan mahimo ra kini maabot sa elektronikong paagi. Ang mga paghangyo mahimo nga ipasaka,” dugang ni Marquez.
“Bisan pa sa pipila ka mga higayon, sama sa nagpahiping mga kondisyon sa kahimsog o alang sa mga tigulang, mahimo silang makapangayo permiso gikan sa Office of the Court Administrator. Gitugotan namo kana,” ingon niya, samtang giklaro usab nga ang tanan nga mga korte makahimo og pagdungog sa komperensya sa video.
Ang mga korte adunay responsibilidad nga maghimo og hearing tungod kay adunay mandato ang batakang balaud nga nagmando sa paghimo og paspas nga resolusyon sa mga kaso nga isang-at sa ilang buhatan.
Sa pagkakaron, dili moubus sa 50 porsyento sa tibouk puersa sa mga korte ang nagpadayon sa ilang trabaho sulod sa lang mga ‘courtrooms’, kini subay sa SC Memorandum Circular No. 45 series of 2020.