DAKBAYAN SA DABAW — Kayang kab-oton sa Pilipinas ang iyang handum nga mamahimo kining drug-free sa tuig 2022, kini ang gibarugan ni Harry Roque ang tigpamaba sa Presidente.
Sa usa ka press briefing niadtong Biernes, Disyembre 11, gibutyag ni Roque nga daku ang ilang pagsalig nga mahatag ni Duterte ang iyang saad sa katawhan nga mamahimong drug-free ang nasud una kini mokanaug sa Hunyo 2022, tungod kay walay puas ang kampanya sa gobyerno batok sa illegal nga droga.
Mipasalig si Roque nga kaya kini, human sa pamulong ni Dangerous Drugs Board (DDB) Chairman Catalino Cuy nga dili na makab-ot ang gihandum nga drug-free nga nasud.
Makab-ot pa, matud ni Roque tungod kay motabang na ang mga lokal nga panggamhanan sa kampanya sa administrasyong Duterte, dungag ni Roque.
Gisaysay niini nga sa 42,045 ka mga barangays, 20,538 na ang gikonsiderang drug-free.
“Kampante pa rin po tayo kung makikipagtulungan po talaga ang lokal na pamahalaan, na iyong natitirang 14,308 barangays ay magiging drug free pa rin pagdating po ng pagtapos ng termino ng ating Presidente ,” dugang ni Roque.
Usa sa mga saad ni Duterte niadtong kampanya alang sa 2016 national elections mao ang pagpa-undang sa illegal nga druga sa nasud. Ang maong saad, matud ni Roque, barugan sa Presidente tungod kay gusto ni Duterte nga mamahimo niya kining legasiya sa iyang pagka-Pangulo.