SA UNANG HIGAYON human mikaylap ang COVID-19 sa Pilipinas, gikataho nga nahidangat na sa nasud niadtong Pebrero 28 ang “first batch” sa CoronaVac, ang tambal batok sa maong sakit nga hinimo sa Sinovac Biotech sa nasud sa China.
“Today, we make another step [forward] in our ongoing fight against COVID-19, as we receive 600,000 CoronaVac doses from the People’s Republic of China (Karong adlawa mihimo na sab kita ug laing lakang pagpakigbatok sa COVID-19 pinaagi sa pagdawat sa 600,000 CoronaVac doses gikan sa People’s Republic of China),” nagkanayon si Presidente Rodrigo Roa Duterte sa iyang pakigpulong.
Matud sa mga taho, ang higante nga eroplano sa People’s Liberation Army of China nga gadala sa CoronaVac mitugpa sa Villamor Air Base sa Pasay City sa may alas-10:10 sa hapon niadtong Domingo.
Ang nahisgutang mga vaccines gidonar sa nasud sa China, ug personal nga gidawat sa president atol sa seremonyas nga gihimo sa Villamor Air Base.
Ang paghidangat sa CoronaVac nahitabo human mihatag ang Philippine Food and Drug Administration (FDA) ug “emergency use authorization” (EUA) sa maong vaccine niadtong Pebrero 22.
Sa iyang pakigpulong, si Presidente Duterte mipasalamat sa nasud sa China nga gitan-aw sa president nga usa ka “gesture of friendship and solidarity” nga maoy nagpalig-on sa relasyon tali sa duha ka mga nasud.
“Akong gipasalamatan si Secretary (Carlito) Galvez (Jr.) ug ang team Pilipinas tungod sa ilang subsob nga pagtrabaho. Ug personal sab nakong pasalamatan si Ambassador Huang Xilian tungod sa iyang dakong tabang aron mahidangat ang mga vaccines dinhi sa ato,” nagkanayon ang Presidente.
Midugang ang President nga ang COVID-19 vaccines kinahanglan ilhon nga “global public good” nga ihatag sa tanan, ma-pobre man o ma-datu.
“Niining importante kaayo nga shipment, nakasiguro ako nga dugang pang mga batches sa vaccines ang mihidangat hangtud nga ang tanang mga Pilipino mabakunahan sa pinaka-dali nga higayon,” miingon si Presidente Duterte.
Gipasalamatan sab sa President ang mga “medical frontliners” alang sa ilang “valuable and selfless contribution” sa pagpakigbatok sa COVID-19.
“Among nakita ang inyong sakrispisyo nga inyong ginahimo kada adlaw, bisan mahilayo kamo sa inyong mga mahal sa kinabuhi ug pag-resgo sa inyong kaugalingong kinabuhi aron matabangan ang mga masakiton,” matud ni Presidente Duterte.
Giawhag ni Presidente Duterte ang tanang mga Pilipino nga walaon na ang kahadlok tungod kay ang mga vaccine miagi ug makuti nga pagtuon pinaagi sa siyensiya ug gitan-aw sa mga eksperto nga mga doctor sa kalibutan.
Matud sa presidente midonar sab ang China sa CoronaVac sa laing mga nasud apan sa Pilipinas lang sila gahatud sa mga vaccines gamit ang ilang eroplano, “ang ubang mao pa ang mikuha sa gidonar nga vaccines.”
Ang FDA mihatag sa emergency approval sa CoronaVac human ang Phase 3 trials niini didto sa nasud sa Indonesia ug Turkey nagpakita ug 65.3-91.2 percent efficacy.
Gawas sa Pilipinas, ang mga nasud sa Indonesia, Turkey, Brazil, Chile, Colombia, Uruguay ug Laos mihatag sab og emergency authorization ngadto sa Sinovac.