DAKBAYAN SA DABAW (Nobembre 6) — Usa ka sakop sa City Transport and Traffic Management Office (CTTMO) gi-aresto sa mga membro sa Tugbok pulis sa gihimong buy-bust operation niadtong Lunes sa gabii didto sa Purok 5, Tugbok ning dakbayan.
Giila ni Senior Inspector Catherine dela Rey, tigpamaba sa Davao City Police Office (DCPO), ang suspetsado nga si Eugene Gil Espinosa Labor, 37, ug molupyo sa naasoy ng Barangay.
Matud ni dela Rey, nakadawat ug taho ang kapulisan nga adunay usa ka “Eugene ” ang tigpayuhot ug ginadiling kon “shabu” didto sa Tugbok Proper ug Sto. Niño Mintal.
Tungod niini, gihimo ang usa ka buy-bust operation nga gipanguluhan ni Chief Insp. Paulino A. Zaulda Jr., sa pakig-alayon sa Philippine Drug Enforcement Agency (PDEA).
Nakuhaan si Labor ug duha ka pakete sa gituhuang shabu ug gi-apil usab pagkuha ang honda nga motor nga adunay plaka numero SA 12007, nga gi-isyu kaniya sa lokal nga panggamhanan.
Mag atubang si Labor ug kaso sa paglapas sa Republic Act 9165 kon Comprehensive Dangerous Drugs Act of 2002.-Jiann A. Padillo/NewsLine.ph
