DAKBAYAN SA DAVAO-— Kapin Tres Mil (3,000) ka mga residente sa lungsod sa Marogong, Lanao del Sur ang namakwit tungod sa kahadluk nga mosulong ang teroristang grupo sa ISIS.
Sa rekord sa Bangsamoro Government Ministry of Social Services karong adlawa, Mayo 29, mokabat na sa 3,154 ka indibiduwal ang namakwit gikan sa ilang mga balay.
Ang pagpamakwit nahitabo human naaresto ang upat (4) ka miembro sa teroristang grupo sa mga awtoridad nga nananum og bomba sa nahisgutang lungsod.
Dunay pay nagkalat nga mga taho sa social media ang maglusad ang grupo og giera sama sa nahitabo sa Marawi siege.
Kagahapon, gikumpirma ni Lanao del Sur Governor Mamintal Adiong, Jr. nga nagdalidali og bakwit ang mga residente sa Marogong tungud sa kahadluk sa Dawlah Islamiya, ang mga mga miembro kanhi miembro sa Maute terror group nga misulong sa Marawi niadtong Mayo 23 hangtud Oktobre 16, 2017.
Matud sa Governador, nang apud-apod na og mga pagkaon ang Provincial Disaster Risk Reduction and Management Office ug ang lokal nga panggamhanan sa Marogong sa mga apektadong residente nga tua na karon sa lungsod sa Binidayan, Tubaran, Bayang, Masiu, Malabang, Balabagan, Calanogas, Bacolod-Kalawi ug sa Lumbatan.
Duna usab mga pamilya nga namakwit didto sa Marawi City.
Apan, gipaniguro sa gobernador nga kontrolado sa kasundaluhan , kapulisan ug ang lokal nga panggamhanan ang seguridad sa katawhan sa Marogong.
Sukad tuig 2022, 16 na ka miembro sa Dawlah Islamiya ang namatay sa engkuentro ug mokabat na sa 32 ka miembro sa Dawlah Islamiya ang nadakpan sa orotidad, apil na niini ang mga namaligya og illegal nga druga,
Ang Police Regional Office-Bangsamoro Autonomous Region ug mga yunit ubos sa 103rd Infantry Brigade sa Marawi City nagbutyag nga ang hulga sa teroristang grupo usa ka paagi aron ipakita nga lig-on pa sila bisan wala na kini kusog nga makigbatok sa gobierno.-Paul T. Palacio
